Los sindicatos denuncien que se siga cola tramitación de la Llei d’Evaluación

Los sindicatos educativos SUATEA, CCOO y CSIF vienen de denunciar que’l Principáu siga alantre cola tramitación parlamentaria de la Llei d’Evaluación Docente y los sos Incentivos. Poro, vuelven pidir que los grupos parlamentarios reflexones sobre la llei, reseñando que “vulnera drechos ya impón un sistema d’evaluación alloñáu de les verdaderes necesidaes del sistema educativu”.

Pa los sindicatos la llei namás tien la sida de sirvir pa “la so rede clientelar”. Refuguen les declaraciones de Riopedre onde afitaba que’l pagu retroactivu nun yera posible pol presupuestu. Según los sindicatos nun se pide’l pagu inmediatu y la cantidá nun pasaría de los 9 millones, “cantidá mui alloñada de los 128 de los que falen”.
.
Critiquen tamién que la Portavoz del Gobiernu, Ana Rosa Migoya, dixera que yera ilóxicu que los funcionarios que nun firmaran la carrera pidan el pagu retroactivu, yá que, según señalen los sindicatos, el procesu foi declaráu illegal y “hai qu’esparder el pagu a tolos ensin lligalu a la fidelidá y sumisión d’una evaluación soxetiva”.
 
Los sindicatos tamién señalen que la llei nun cumple trámites básicos como la so aprobación pol Conseyu Escolar, la Mesa Sectorial d’Educación y la de Función Pública. Amás de cuntar cola refuga de la Xunta de Personal Docente non Universitariu y que los dos abogaos presentes nes comparecencies mentaran delles irregularidaes de la llei, señalen.