Fnast.net entama un conciertu en Xixón pa celebrar el so primer aniversariu

|

El mediu d’información musical Fnast.net cumple un añu y pa celebralo entama un conciertu aniversariu’l prósimu vienres 8 de xineru. Les actuaciones de La Tarrancha, Black Panthys Party, La Patriband Folk Orl.lesta y 13 Palabras van ser les encargaes de poner son a la fiesta de cumpleaños. L’actu va ser nel Savoy de Xixón y xunto a los conciertos habrá sorteos, venta de material musical, una rifa la xata y música asturiana.

El pasáu 5 de xineru del 2009 Fnas.net presentábase como “un mediu de comunicación dixital que tien l’enfotu de recoyer tolo relacionáu cola actualidá musical alternativa asturiana”. Asina ye como, con conteníos en llingua asturiana, defensa d’un modelu sociocultural xusto y usu y promoción de les llicencies Creative Commons, esti portal dixital entamaba a dar los sos primeros pasos, informando de tolos estilos musical fechos n’Asturies.
 
L’actu va ser nel Savoy Drinks & Music de Xixón (cai Pelayo, 2), escomenzando a les 20.00 y nél tamién va haber sorteos y venta de material musical, va sonar música asturiana y va facese una rifa la xata. P’autoxestionar esta folixa-aniversariu hai un preciu de 4 € la entrada y de 10 € incluyendo entrada y la camiseta de “Asturies tien son” de regalu.
 
Presentación del Anuariu Sonoru ‘09
Dende Fnast.net anunciárase tamién qu’esta primer selmana de xineru diba presentase l’Anuariu Sonoru’09, un recopilación de cantares y vidioclips fechos por grupos asturianos durante’l 2009. Sicasí, esta presentación nun va ser esti vienres 8 de xineru como teníen programáu los organizadores, si non que sedrá la última selmana de xineru o primera de febreru.

Contador Estadistiques