La cantante de tonada Mariluz Cristóbal Caunedo va recibir el 8 d’abril el XI Distintivu Fini Suárez pol so respetu al estilu tradicional nel so trabayu. La entrega d’esti premiu va coincidir col pregón de la Folixa na Primavera de Mieres.
La ufierta pública d’emplegu d'Asturies nel 2011 va ser de 174 places. El Conseyu de Gobiernu aprobó la convocatoria de 125 places docentes, lo que supón un cambiu d'opinión tres la decisión primera de nun convocar oposiciones.
El vicepresidente primeru de Caxastur, Santiago Martínez Argüelles, señáló que ve vidable un Bancu Base formáu pola caxa asturiana, Caja Cantabria y Caja de Extremadura. Les tres entidaes dexaron fuera de la fusión a Caja Mediterráneo (CAM).
Los centros asturianos de Rosario y Paraná, n’Arxentina, van acoyer los díes 7 y 8 d’abril los actos del ‘Día de les lletres nel esterior’. La conseyera de Presidencia, Xusticia y Igualdá, María José Ramos, va presidir esta celebración.
El conceyu de Ḷḷena ye’l llugar escoyíu por WWF Asturies (ADENA) pa facer una plantación de más de 300 árboles autóctonos en collaboración con ciudadanos. L’oxetivu ye concienciar a la población pa lluchar contra’l cambiu climáticu.
El recibu del gas va xubir esti vienres una media mensual de 1,44 euros. El Gobiernu estatal decidió xubir nun 4,1 por cientu’l preciu del gas y nun 6,1 por cientu la bombona de butano. Mentes, conxela’l recibu de la lluz.
Unes 1.500 toneales d’escories salines procedentes d’una empresa de Somonte vertiéronse nuna finca non autorizada pa residuos peligrosos asitiada en Pion. La Coordinadora señala qu’estos materiales pueden afeutar al ríu España.
El Conseyu de la Mocedá d’Asturies (CMPA) organiza unes xornaes n’Uviéu col títulu ‘Crisis. What crisis!’ pal 9 d’abril nel Auditoriu Príncipe Felipe d’Uviéu. El día 6, como actividá complementaria, entamen una actuación de Leo Bassi.
Blima, Toli Morilla, Llangres, La Bandina, Misiva, K-Nalón, La Tarrancha y La Coḷḷa Propinde son les ocho bandes que van participar nel XXIII Conciertu pola Oficialidá. El recintu ferial de Xixón repite como escenariu del eventu.
L’asamblea xeneral de Caxastur, aconceyada esti miércoles nel Hotel Reconquista d’Uviéu, acordó non permitir la dixebra del so negociu financieru a favor del Bancu Base. Caja Cantabria y Caja de Extremadura tomaron la mesma decisión.
