Caxastur nun autoriza la dixebra del so negociu financieru a favor del Bancu Base

L’asamblea xeneral de Caxastur, aconceyada esti miércoles nel Hotel Reconquista d’Uviéu, acordó non permitir la dixebra del so negociu financieru a favor del Bancu Base. Caja Cantabria y Caja de Extremadura tomaron la mesma decisión.
 
D’esta forma, Caja Mediterráneo (CAM) quedó sola nel proyeutu de fusión del Bancu Base que diba convertise na tercer caxa del Estáu, tres Bankia y La Caixa, y na quinta entidá financiera. Agora, tres la decisión de l’asamblea xeneral, la entidá asturiana “queda desvinculada a tolos efeutos del Contratu d’Integración del 27 de xunetu del 2010 y escluyida del Sistema Institucional de Proteición (SIP) oxetu del mismu, al nun cumplise la condición necesaria pa la puesta en marcha efeutiva”, según informó la Comisión Nacional del Mercado de Valores (CNMV).
 
Les discrepancies pa la fusión medraron ente les cuatro caxes esta selmana tres la decisión del Bancu Base de pedir 2.784 millones al Fondo de Reestructuración Ordenada Bancaria (FROB), a lo qu’hai que sumar un préstamu anterior de 1.493 millones, que convertiría al Estáu nel accionista mayoritariu del SIP. Dende la prensa especializada se sospecha qu’esta cantidá alta demandada pol Bancu Base ta causada por unes perdes crediticies de CAM mayores de lo esperao.
 
Otra manera, la Corriente Sindical d’Izquierda (CSI) fixo güei la concentración que tenía convocada col lema ‘Por una caxa al serviciu d'Asturies. Contra la privatización de Caxastur’ pese a que yá se conocía cuál diba ser la decisión de l’asamblea tres les noticies que diben llegando a lo llargo del día. A les 17 hores, un grupu de mediu centenar de persones agrupóse ante l’Hotel Reconquista per una hora pa informar a los ciudadanos de les intenciones del Gobiernu estatal de privatizar les caxes d’aforros y pa defender la creación d’una banca pública fuerte al serviciu de los ciudadanos.