El Conciertu pola Oficialidá va celebrase’l 16 d’abril en Xixón cola participación d'ocho bandes

Blima, Toli Morilla, Llangres, La Bandina, Misiva, K-Nalón, La Tarrancha y La Coḷḷa Propinde son les ocho bandes que van participar nel XXIII Conciertu pola Oficialidá. El recintu ferial de Xixón repite como escenariu del eventu.
 
La Xunta pola Defensa de la Llingua Asturiana dio güei anuncia del cartel definitivu d’esta cita obligada pa los aficionaos a la música asturiana na llingua del país na que, nun ambiente de folixa, se reivindica la reconocencia de los derechos llingüísticos a tolos asturianos. Esti conciertu, que cuenta cola participación solidaria de tolos grupos, carauterízase pol ésitu de públicu añu tres añu y l’abondancia y calidá de les propuestes de les bandes, con estilos que van dende’l folk más tradicional al punk-rock o’l hip-hop.
 
Esta edición nueva del Conciertu pola Oficialidá, que tien el sofitu d’ASTURIES.COM, va celebrase’l sábadu 16 d’abril, a partir de les 19 hores, y va tener un preciu de 8 euros, na venta anticipada, y de 10, na puerta. Les entraes van poder mercase en La Casa Posafuelles y Malayerba nunca muere, n’Uviéu; Café Trisquel y El Barucu, en Xixón; El Cafetón, n’Avilés; La Gueta, en Candás; Mesón Cervantes, en Tinéu; Bar Azul, en Cangas; Café Centro, en La Puela; L’Abellugu, en Mieres; La Palmera, en La Pola Ḷḷena; Abre César, en La Pola Siero; Bar Piero’s, en Grau; Bar Maybe, en L’Infiestu; y Tom Mallory, en L’Entregu.