Nel mes de febreru, Asturies rexistró 88.072 desemplegaos, cifra más alta rexistrada dende 1996. En Conceyu Abiertu entrugábamos sobre la evolución futura del paru nel país y una mayoría grande cree que les cifres van siguir medrando.
José Sócrates, primer ministru de Portugal dende 2005, dimitió’l miércoles del so cargu tres el refugu parlamentariu al so plan d’axuste económicu. Esta decisión fai aumentar los rumores sobre un rescate financieru al país lusu.
El Tribunal Supremu prohibió’l miércoles la inscripción de Sortu, formación nueva de la izquierda abertzale, nel rexistru de partíos. La Fiscalía y l’Abogacía del Estáu presentaren una demanda al considerar a Sortu herederu de Batasuna.
Dos grupos d’activistes de Greenpeace entraron na mañana d’esti xueves vistíos de blanco a les sedes centrales del PSOE y PP pa pidir el fin de la enerxía nuclear nel Estáu. Esta aición foi simultánea y pacífica.
Softastur ta acabante d’anunciar la xubida a la rede de la versión 4.0 del Firefox de Mozilla. Esta versión nueva del restolador web ta disponible en llingua asturiana de baldre pa tolos sistemes operativos.
Cientos d’estudiantes universitarios movilizáronse esti meudía n'Uviéu pa defender la universidá pública. Les Asamblees d’Estudiantes de la Universidá d’Uviéu convocaron esta manifestación.
AENA espublizó esti miércoles una encuesta fecha ente los viaxeros qu’usen l’Aeropuertu d’Asturies pa conocer cómo ye’l pasaxeru tipu de la terminal. Ésti ye un home de 42 años que viaxa 9,2 veces al añu.
Con motivu del primer aniversariu na so sede nueva –la cárcel correccional antigua d’Uviéu–, l’Archivu Históricu d’Asturies acueye una muestra de sellos del Conseyu Soberanu d’Asturies y Lleón. Va tar abierta al públicu per un mes.
El Serviciu de Normalización Llingüística del Conceyu Cangas presenta esta selmana dos nueves campañes de promoción de l’asturianu dirixíes al ámbitu de la salú. Éstes lleven el nome de ‘La salú, de sentíu común’ y ‘Afacédevos en casa”.
Un total de 72 conceyos del país van repartise los 8,5 millones que va entregar el Gobiernu a los ayuntamientos al traviés del Fondu de Cooperación Llocal. Estes perres tán destinaes a asegurar infraestructures básiques a la población.
