Les 3.080 persones actives nel Rexistru de Demandantes de Vivienda Protexida (Red Viva) van poder aspirar a les 947 viviendes protexíes qu’ufierta la Conseyería de Bienestar Social y Vivienda. Los pisos distribúyense per siete conceyos.
La Xunta Eleutoral rexistró un total de 18 candidatures pa les eleiciones a la Xunta Xeneral del 22 de mayu. Esta cifra supón un récord en democracia al superar les 12 formaciones que participaron nel 1999 y nel 2003.
El Centru Polivalente La Baragaña, de Candás, ye la sede d’una esposición entamada pol Serviciu de Normalización Llingüística de la Mancomunidá del Cabu Peñes colos materiales de les sos campañes. Ésta va tar abierta’l públicu hasta’l 8 de mayu.
La candidatura d’unidá popular Conceyu Abiertu formalizó les sos candidatures a nueves conceyos y a la Xunta Xeneral. Mariu Arbesú va pela circunscripción central; Antón Fuertes, pela occidental; y Daniel Cueli, pela oriental.
La denuncia de la Coordinadora Ecoloxista d’Asturies poles 1.500 tonelaes d’escories salines de segunda fusión vertíes nuna finca nun autorizada de Pion va p’alantre. La Fiscalía de Mediu Ambiente ta acabante d’abrir dilixencies d’investigación.
Francisco Marcos (Uviéu, 1970) va ser la primer persona qu’ocupe’l cargu de Defensor del Usuariu y del Cliente de la Sociedad General de Autores y Editores (SGAE). D’esta forma, l’organización pretende meyorar “la calidá de serviciu y la imaxe social”.
El Muséu del Pueblu d’Asturies acueye de xueves a domingu la segunda edición del Primer Sidre l’Añu. El II Certame Agroalimentariu Nacional espera superar la cifra de 5.000 visitantes del añu pasáu.
L’oxetivu de la cámara de Kadir van Lohuizen va mostrar a les persones que s’averen a la Biblioteca del Fontán dende esti martes la situación por contaminación por petroleu del delta del ríu Níxer, en Nixeria. La esposición va tar abierta hasta'l día 25.
L’Autovía del Cantábrico (A-8) y les nacionales 632 y 634 van tener problemes de tráficu nesti periodu vacacional, según anunciaron dende la Direición Xeneral de Tráficu (DXT). L’organismu recomienda rutes alternatives cuando sía posible.
Miguel Iglesias Ballina, secretariu d’Emplegu de Comisiones Obreres (CC OO) d’Asturies, señaló esti llunes que 30.950 paraos asturianos nun tienen cobertura económica. Son cifres que nun se conocíen dende 2005, según el sindicatu.
