Esti xueves abre les sos puertes el Primer Sidre l’Añu

El Muséu del Pueblu d’Asturies acueye de xueves a domingu la segunda edición del Primer Sidre l’Añu. El II Certame Agroalimentariu Nacional espera superar la cifra de 5.000 visitantes del añu pasáu.
 
Tres l’ésitu de la primer edición del certame entamáu pola revista La Sidra y la Fundación Asturies XXI, nesta ocasión los organizadores ampliaron el festival una xornada y programaron una serie d’actividaes novedoses cola sidra y la cultura asturiana como protagonistes. Asina, les persones que s’averen al Pueblu d’Asturies van poder presenciar actuaciones musicales, bailles, exhibición de deportes tradicionales, talleres, bolos o tasties gratuites, amás del II Asturiana y Sidra, certame de tonada que ta integráu nel festival. Nesta ocasión, cerca de trenta establecimientos hosteleros tamién van participar nel festival al traviés de les I Xornaes Gastronómiques de la Primer Sidre l’Añu, con dos menús tradicionales: el d’espicha y el mariñán.
 
Pol preciu de 5 euros, más el vasu, los visitantes del Primer Sidre l’Añu va poder prebar sidra de más de 80 llagares, ente los que van tar dalgunos de fuera del país, según confirmen dende la organización. Amás, el pabellón de la Expo’92 tamién va acoyer delles actividaes de calter más cultural, como tasties guiaes, presentaciones y esposiciones, ente les que destaca la d’etiquetes de sidra del coleutivu Sidrastur o la del IV Concursu de Semeyes La Sidra.
 
Jorge Espina, asesor de la Conceyalía de Cooperación, Cultura Tradicional y Política Llingüística, va ser l’encargáu d’inaugurar esta segunda edición del festival el xueves al meudía xunto con Félix de la Fuente, ganador del Campeonatu d’Asturies d’Echadores de Sidra del 2010, que va escanciar el primer culín del certame. Tamién nel tendayu va sentise pela tarde, a les 17 hores, los primeros cantares de tonada del II Asturianada y Sidra, pa depués da pasu, a les 19 hores, a una actuación de Taranus. Mentes, nel pabellón, va haber unes tasties guiaes por Manuel Busto sobre la sidra de xelu (12.30 hores), otra de sidra alemana por Samuel. M Trabanco (18 hores) y una conferencia de David Rivas con nome ‘La sidra na tradición asturiana’ (20 hores). Otra manera, les persones que quieran pasar tol día nel Primer sidre l’añu van poder disfrutar de tortilles salones de chorizu y de bacalláu, ente otres, nel chigre del festival.
 
El vienres ta prevista l’actuación de la Escuela de Música Tradicional La Quintana, a les 11.30 hores, amás del entamu del I Tornéu de Cuatriada Primer Sidre l’Añu al meudía. Yá de tarde, a les 18 hores va actuar la Banda de Gaites Villa de Xixón y, a les 20 hores, Latira. Mentes nel pabellón, el protagonismu va ser pa la sidra brut, con prebes guiaes por Manuel Busto (18 hores). Tamién va tar presente Xaviel Vilareyo, que va ofrecer la conferencia ‘La sidra n’Asturies de Santiyana’ a les 20 hores. El platu del chigre nesta xornada va ser fabada.
 
Una exhibición de tonelería, por Argüelles S. a les 12.30 hores, va ser la gran novedá del sábadu. Yá de tarde, a les 17 hores, ta prevista la presentación de la nueva Sidre Natural Valverán, de Llagares Masavéu, y, a les 19 hores, l’entamu d’un taller taller de baille’l país acompañau por bandina tradicional impartíu pol Grupu Los Xustos. Nel pabellón van celebrase delles tasties guiaes y va presentase’l llibru ‘La sidra y la poesía. Versos ensin magaya’, de José Luis Campal Fernández (20 hores). Los que quieran comer dalgo nel chigre del festival van poder disfrutar esti día de picadillu.
 
El domingu va ser la xornada final del Primer Sidre l’Añu, que va abrise cola final del tornéu de cuatriada, al meudía. Pa les 14.30 hores va homenaxease al monologuista Xosé Fernández Pandiella ‘Pandiella’, que va actuar nel tendayu. Mentes, nel pabellón, ta prevista una tastia guiada de sidra d’aguardiente por Manuel Busto, a les 13 hores. La comida del chigre van ser tortos acompañaos de quesu y picadillu, entre otres opciones.