Amnistía Internacional muestra nuna esposición n’Uviéu la contaminación en Nixeria por causa del petroleu

L’oxetivu de la cámara de Kadir van Lohuizen va mostrar a les persones que s’averen a la Biblioteca del Fontán dende esti martes la situación por contaminación por petroleu del delta del ríu Níxer, en Nixeria. La esposición va tar abierta hasta'l día 25.
 
Baxo’l nome ‘Nixeria, tierra contaminada, tierra qu’arde’, Van Lohuizen, fotógrafu de l’axencia NOOR, y Amnistía Internacional (AI) presenten una esposición que muestra al traviés de cuatro grandes módulos de semeyes “la contaminación causada pola industria del petroleu nel delta del Níxer, en Nixeria, asina como les consecuencias d’esa contaminación pa les personas qu’habiten ellí”, afirmen dende la ONG. La estraición comercial de petroleu nel Níxer principió hai mediu sieglu, xenerando grandes riqueces que nun repercuten na población de la zona, que vive na probeza. “Pue que’l petroleu proporcionara riqueza a dalgunes personas, pero pa munches conllevó emprobecimientu, conflictos, abusos contra los derechos humanos y desesperación”, confirmen dende AI, ensin escaecer tamién “el grau altu de contaminación y los daños medioambientales”.
 
Esta situación, xunía “al abandonu grave por parte del Gobiernu” y l’actuación de grupos armaos na zona, dexa a la población del llugar nuna situación mui complicada. Dende AI se recuerda’l trabayu de Ken Saro-Wiwa, “escritor y activista de derechos humanos que l’Estáu de Nixeria executó xunto con otros ocho miembros del pueblo ogoni nel 1995. Quince años depués de la so muerte, tovía continúen los mesmos abusos contra’l mediu ambiente y contra los derechos humanos qu’él combatió”. Les persones qu’acudan a esta esposición, que tres tar esta selmana na Biblioteca del Fontán va pasar a la Facultá de Biología, van poder facese una idega de cuála ye la situación d’esti país centroafricanu.