Continúa la polémica poles supuestes actuaciones irregulares del ex-arquitectu municipal de Xixón

L’ex-arquitectu municipal de Xixón, Ovidio Blanco, que ta siendo investigáu pola Fiscalía por cuenta de la compraventa d’un terrenu incluyíu nel plan parcial de Cabueñes na qu’algamó un beneficiu de 600.000 euros continúa nel centru de la polémica. Mientres que SOXEPSA decidió finar el contratu col arquitectu “de mutuo acuerdu”, la Plataforma contra’l Muro de Cabueñes va personase como acusación nel procesu abiertu pola Fiscalía.

Ayer el Conseyu d’Alministración de la Sociedá Mista de Xestión y Promoción del Suelu, S.A. (Soxepsa) alcordó “dar por resueltu’l contratu del arquitectu Ovidio Blanco Suárez”. Esta decisión prodúzse de "mutuo acuerdu" depués que l’afectáu unviaré una carta a Soxepsa ufriendo la resolución del contratu "por cuenta d’evitar posibles daños a la imaxe de la sociedá". L'arquitectu taba contratáu hasta'l 2010.

 
Vecinos de Cabueñes quieren personase como acusación
 
Per otru llau la “Plataforma Ciudadana contra’l Muro de Cabueñes”, agrupación de ciudadanos contra los planes urbanísticos del Conceyu de Xixón nesa parroquia, dio anuncia de que va personase como acusación nel procesu abiertu pola Fiscalía. Según esplicó l’asesor técnicu de la Plataforma, Ignacio Martínez, los vecinos van aconceyar güei p’alcordar esta medida, así como la posibilidá de presentar un contenciosu-alministrativu por irregularidaes nel plan d’actuación del Plan Parcial de Cabueñes al conseñar informaciones contradictories sobre la propiedá de dalgunos terrenos, que “per un llau apaecen como propiedá de particulares y per otru como propiedá de la promotora Lamas-Barajas”.
 
Según afitó’l técnicu, esta situación fai "nulu de plenu derechu" el Plan Parcial, yá que “les promotores nun cumplen el requisitu de disponer de más del 50 por cientu de los terrenos”, polo que pidió la paralización del Plan porque "esto nun se puede producir nel nuesu sistema xuridicu".
 
Crítiques de la UNA al conceyal d'Urbanismu y a IU

Unidá Nacionalista Asturiana sumóse a les crítiques. El voceru de vivienda d’UNA Daniel Fernández, quixo dexar afitáu’l maltar de la so organización por “la incomprensible continuidá del conceyal Sanjurjo nel Ayuntamientu de Xixón y la negativa d’IU a facer una comisión d’investigación”.

Pal voceru nacionalista “lo único que fizo’l Gobiernu municipal énte l’escándalu de Cabueñes ye mentir ya insultar a los vecinos afectaos, ensin contrastar nengún de los datos aportaos por ellos y qu’amuesen grandes irregularidaes en tol Plan Urbanísticu de Cabueñes” y añadió que “el conceyal Sanjurjo tuvo de rectificar otra vuelta les declaraciones que ficiera nun entamu sobre esti casi, neto yá pasara col tema de los horros de San Andrés de los Tacones, amosando asina una actitú obstruccionista en tol procesu, lo que fai intolerable que siga exerciendo les sos responsabilidaes nel Ayuntamientu”.