ERC y Aralar van dir xuntos a les elecciones europees

Les formaciones nacionalistes entamen los alcuerdos de cara a les próximes elecciones europees de xunu. D’esti mou, Esquerra Republicana de Catalunya ta acabante de dar anuncia del alcuerdu cola formación vasca Aralar pa concurrir xuntos a los comicios.  Dende ERC dase por fecho tamién la participación na coalición electoral, que vuelve a denominase “Europa de los pueblos”, de la Chunta Aragonesista y d’Entesa Per Mallorca.

D’esti mou una parte de les formaciones de la izquierda nacionalista van volver axuntase nuna alianza electoral pa les elecciones europees del 7 de xunu. El candidatu propuestu por ERC ye l’historiador Oriol Junqueras. Sicasí, la coalición nun ta pesllada dafechu, yá qu’en palabres del vicesecretariu de Coordinació Interna i Acció Electoral d’Esquerra, Eduard López, “Esquerra continúa trabayando na llínia de vertebrar una amplia coalición de fuerces polítiques que-y permitan concurrir con garantíes suficientes a estos comicios”. La dulda ye si Eusko Alkartasuna, formación que participó na coalición nes anteriores europees va volver participar na mesma por cuenta de la preferencia d’ERC por un competidor electoral directu d’EA, como ye Aralar.

Pela so parte no que cinca a la participación de dalguna formación política asturiana nesta coalición qu’entama ERC, el partíu catalán nun fexo nengún posicionamientu públicu al respectu. Si bien nel añu 2004 Andecha Astur participó d’esta coalición, dende la formación asturiana conseñaron hai unos díes al traviés d’un comunicáu que “ta intensificando les conversaciones colos sos contautuos internacionales y colos demás miembros de la coalición Europa de los Pueblos” de cara a la so posible participación otra vuelta nesa coalición.