La Eurocámara pide conxelar los fondos comunitarios pa España si nun acaba colos abusos urbanísticos

El plenu del Parlamentu Européu aprobó güei por una amplia mayoría de 349 votos a favor, 110 a la escontra y 114 astenciones un informe que pide conxelar los fondos comunitarios pa España si nun se resuelven los abusos urbanísticos denunciaos en Bruseles y por ciudadanos de dellos países de la UE. L'informe contaba cola oposición de socialistes y populares españoles, que nun llograron convencer al restu d'eurodiputaos de los sos partíos d'otres nacionalidaes de que votaren a la escontra.

   Trátase de la tercer vez que'l plenu de la Eurocámara denuncia los abusos urbanísticos n'España na actual llexislatura. La primera foi n'avientu del 2005 y la segunda en xunu del 2007.

   La resolución, ellaborada pola verde danesa Margrete Auken, pide suspender y revisar tolos nuevos planes urbanísticos n'España que nun respeten el mediu ambiente y nun garanticen el derechu a la propiedá, asina como l'anulación de los desarrollos urbanísticos en cursu que nun s'axusten a la llexislación comunitaria. Denuncia amás que los derechos de propiedá nun tán apropiadamente protexíos pola llexislación española y que'l sistema xudicial nun da respuestes a los casos d'abusos.

   Socialistes y populares españoles presentaren resoluciones alternatives pa suavizar el conteníu del informe, pero dambes se refugaron. La del PP refugóse por 393 votos a la escontra y sólo 126 a favor. La del PSOE contaba de primeres col apoyu de tolos socialistes europeos. Pero xusto enantes de la votación, el llaborista británicu Michael Cashman anunció que retiraba'l so nome del testu del PSOE y pidió que se votare l'informe Auken sin cambios. L'alternativa socialista salió derrotada por 436 votos a la escontra y sólo 72 a favor.

   L'informe Auken denuncia que "toles alministraciones --central, autonómica y llocales-- son responsables d'entamar un modelu de desarrollu non caltenible, que tuvo gravísimes consecuencies, por supuestu medioambiental, y amás, sociales y económiques".

   Los eurodiputaos espresen en particular la so "preocupación pola situación de la planificación urbana nel conceyu de Marbella, n'Andalucía, onde se construyó illegalmente decenes de miles de viviendes, qu'incumplen probablemente la llexislación comunitaria".

   Tamién se censura que dalgunes urbanizaciones se construyeron en zones protexíes pola rede Natura 2000, como les urbanizaciones en Cabu de Gata (Almería) y Murcia.

   La resolución indica que la falta de "claridá, precisión y seguridá xurídica" na llexislación vixente n'España no que se refier al derechu de propiedá y la falta d'una paralización apropiada y coherente de la llexislación medioambiental son les causes de munchos de los abusos urbanísticos. Too ello, sumáu a la falta de determín nos procedimientos xudiciales, "xeneró una forma de corrupción endémica".

   L'informe critica amás que les autoridaes xudiciales españoles "nun tán debidamente preparaes" pa tratar los casos d'abusos urbanísticos, que los tramiten con demasiada lentitú y que "les sentencies dictaes en munchos d'estos casos nun puen executase de manera que compense a les víctimes de tales abusos".

   "Ello reforzó la impresión compartida por munchos ciudadanos de la UE de nacionalidá non española, sobre la falta d'actuación y parcialidá de la xusticia española", prosigue'l testu.

   Pa facer frente a estos problemes, la Eurocámara "pide a les autoridaes españoles que s'anulen toles figures llegales que favorecen la especulación, tales como l'axentes urbanizador".

   Tamién s'encamienta a revisar "urxentemente" y a modificar la Llei de Costes "a fin de protexer los derechos de los llexítimos propietarios de viviendes y d'aquellos que poseen pequeñes parceles en zones de la costa que nun tien un impautu negativu sobre'l mediu ambiente costeru".

   De la mesma manera, los eurodiputaos piden a les autoridaes rexonales y nacionales que pongan en marcha mecanismos pa "axilizar l'accesu a la xusticia y la indemnización a les víctimes d'abusos urbanísticos en virtú de l'aplicación de la llexislación en vixencia".