L'equipu xurídicu del PP d'Asturies prepara estos díes una serie d'espedientes pa presentar, previsiblemente la próxima selmana, na Fiscalía tola documentación relativa a la tramitación pa la instalación d'una planta embotelladora d'agua del parque de Somiedu. Según esplicó'l diputáu del PP na Xunta Xeneral del Principáu d'Asturies, Alfonso Román López, el procesu valió pa qu'una empresa privada "se beneficiare con dineru públicu", y añadió que "equí hai dalgún tipu de delitu".

El sindicatu SUATEA señaló que la ufierta d'empléu públicu pa especialidaes d'Educación Primaria ye "raquítica" y cree que "nun respuende nin a les espectatives xeneraes pola propia alministración nin a la situación d'accesu transitoriu que prevé la LOE". Amás criticó a Izquierda Unida por cuenta que "modificó la so postura incial d'apoyu a les reivindicaciones del profesoráu pa pasar a votar les tesis contraries".

El coordinador xeneral d'IU n'Asturies, Jesús Iglesias, señaló que "siempre ye preferible equivocase dientro de la organización qu'acertar fuera". Iglesias refirióse asina a la postura qu'adoptó'l diputáu García Valledor, al frayar la disciplina de votu del so grupu parlamentariu tres apoyar la selmana pasada la moción presentada pol PP na que se pidía la retirada del plan d'evaluación del profesoráu y la convocatoria de la mesa sectorial d'educación.

El conseyeru de Mediu Ambiente, Ordenación del Territoriu y Infraestructures, Francisco González Buendía, dixo güei que'l Principáu trabaya "intensamente" pa establecer nueves llinies aérees dende Asturies. "Ye un tema complexu, porque les compañíes tán faciendo los sos propios númberos", apuntó.

El voceru del Bloque por Asturies, Pablo Fernández, manifestó que'l serviciu de normalización llingüística del Ayuntamientu de Llaviana lleva dellos díes peslláu y calcó na situación de desemplegu de la so trabayadora. L'agrupación exixe la correición darréu de la situación y anuncia midíes ante la Comisión de Conflictos

La Escuela d’Arte d’Uviéu ufre la posibilidá de conocer una selección de los meyores trabayos profesionales d’antiguos alumnos dientro de les sos cuatro grandes families profesionales: Artes Aplicaes a la Escultura, Diseñu d’Interiores, Diseñu Gráficu y Artes Aplicaes al Llibru. La muestra va tar asitiada nel patiu de la escuela hasta'l prósimu día 22 d'abril.

Un penalti claru a favor del Sporting non señaláu y un gol llegal anuláu foi’l balance d’una actuación arbitral qu’inclinó’l partíu pal Racing, un equipu qu’amosó una gran efectividá por mor que les dos úniques veces que llegaron claramente a la portería asturiana tresformáronse en goles. Esta derrota pon al Sporting nuna situación complicada, a namás tres puntos del descensu.

• Iglesias diz que la posición de Valledor tien "encaxe difícil" mentes que'l Bloque nun se pronuncia
• El diputáu d'IU va tomar la decisión definitiva depués de Selmana Santa

El diputáu d'IU-BA-Verdes, Francisco Javier García Valledor, dixo güei que tanto él como'l so grupu parlamentariu y la organización política abren agora un periodu de tiempu d'unos díes pa decidir si continúa como diputáu o si abandona'l so acta de parlamentariu na Xunta Xeneral del Principáu d'Asturies.

Dos cases desagospiáronse por peligru d'esbarrumbe na aldea de Ronzón (L.lena), según informó la plataforma "El Mesqueiru". El motivu, según espunxeron, ye'l movimientu de tierres provocáu pola escavación del túnel de la variante de Payares, que pasa unos 40 metros perbaxo. Les viviendes, apuntaron, sufren d'abondes resquiebres nes paredes, puertes y ventanes que nun abre, y suelos que se llevanten.

La Folixa na Primavera, festival folk que se celebra en Mieres dende va 14 años, celebra esti fin de selmana una nueva edición. Otra vuelta, una mezcolancia de grupos asturianos y foriatos va ser la qu'igüe la propuesta musical de la Folixa, una de les cites más importantes dientro del calendariu folk n'Asturies.