La Casa’l Conceyu de Llangréu acoyó la presentación de la campaña de normalización social del asturianu "El Mio Primer Vocabulariu, vocabulariu básicu de la Llingua Asturiana n’imáxenes". L’actu presidiólu l’Alcaldesa de Llangréu y contó cola presencia de la Conceyala de Política Llingüística, amas del diseñador de la campaña, Alfonso Zapico y el responsable del Serviciu de Normalización Llingüística llangreanu, Eloy Antuña.

El paru aumentó n'Asturies un 1,2 por cientu'l mes de marzu pasáu hasta asitiase en 74.381 desempleaos, según datos del Ministeriu de Trabayu y Inmigración. Asturies foi xunto con Baleares (+1,06) les comunidaes onde menos subió'l desempléu. A nivel estatal el desempléu superó los 3,6 millones de paraos, un 3,5 % más.

Los sindicatos CSI, SUATEA y CGT, xunto a los partíos PCA, UNA, PCPE y Andecha Astur, amás d’otres organizaciones como FUSOA, convoquen a manifestase esti xueves 2 d’abril a les 19:30 hores na plaza L’Humedal de Xixón contra “la crisis del paru” baxo’l lema “a los banqueros, grandes empresarios y al so gobiernu hai que paralos saliendo a la cai”.

L’Academia de la Llingua Asturiana, en collaboración col Serviciu de Normalización Llingüística del conceyu de Mieres, va poner un cursu d’asturianu p’adultos que va constar de 36 hores llectives. El cursu ye de baldre y va entamar el 14 d’abril nel Colexu Públicu “Aniceto Sela”. L’horariu va ser martes y xueves de 17 a 19 hores.

L’Antiguu Institutu de Xixón celebra esti vienres a les 20:00 hores na Sala de Conferencies un “Alcuentru poéticu” col escritor Ignaciu Llope, que ta acabante d’asoleyar el so últimu poemariu tituláu “El combate melancólicu” (Suburbia ). La presentación va facela Aurora García Rivas y l’alcuentru va contar tamién cola música de Daniel García de la Cuesta.

Por cuenta de la celebración el próximu 20 de xunu del Día de les Lletres Asturianes na Casa d'Asturies en Valencia, convócase'l I Concursu de Rellatu Curtiu, que tien como oxetivu "fomentar la presencia y caltener el usu de la llingua asturiana ente la emigración asturiana de la ciudá".
 

La Xunta pola Defensa de la Llingua Asturiana señaló que l'asturianu “entró por fin nos planes d'estudiu de la Escuela Universitaria de Maxisteriu” y rescampla que ye “la segunda vez que les intenciones escluyentes de la dirección del centru fueron refugaes por una mayoría clara”. Tamién'l Bloque por Asturies y Unidá Nacionalista Asturiana espresaron’l so contentu pol resultáu algamáu.

El grupu de folk asturianu La Bandina va hermanar l'asturianu col euskera tocando nuna fiesta de La Korrika, iniciativa que se celebra cada dos años y que percorre Euskadi, Iparralde y Navarra como medida de sensibilización y promoción del euskera. La Bandina va compartir cartel con otros grupos -y otres llingües- del Estáu español.
 

La Executiva del Bloque Nacionalista Galego dio anuncia de la intención de la formación gallega de sumase a la coalición encabezada por Esquerra Republicana de Catalunya y Aralar. Pela so parte, estes dos últimes formaciones conseñaron ayer en Bilbao el pactu que pon en marcha la candidatura conxunta a les elecciones europees de xunu, a la qu'esperen que se sumen más fuerces de la izquierda nacionalista del estáu.

La Coordinadora Ecoloxista d’Asturies presentó alegaciones énte’l Conceyu de Les Regueres nel trámite de la llicencia municipal pal parque eólicu na Peña’l Cuervu, na llende de los conceyos Les Regueres, Candamu y Illas, por supuestes “irregularidaes”.