L'Academia de la Llingua abre'l próximu 25 de mayu'l plazu pa los sos XXVII Cursos de Branu

|

L'Academia de la Llingua Asturiana abre dende esti 25 de mayu hasta'l 6 de xunu'l plazu p'apuntase a la edición 2009 de los sos cursos de branu. Los cursos van ser en Santantolín (Ibias) en réxime d'internáu del 3 al 14 d'agostu de 2009. Esta edición compónenla los Cursos Elemental y Avanzáu de Llingua Asturiana, dambos en collaboración cola Universidá d'Uviéu, asina como los d'Afondamientu Cultural y Llingüísticu y el Curso de Gallego-Asturiano (Primeira Fase).

Dientro de los Cursos d'Afondamientu Cultural y Llingüísticu alcuéntrense "Capacitación pa la Traducción al Asturianu" (en collaboración cola Universidá d'Uviéu), "La presencia de la Llingua Asturiana n'Internet. Nueves posibilidaes", "Otros xuegos y tradiciones populares na enseñanza", "Ecoloxía y Mediu Ambiente n'Asturies", "Ferramientas prá normalización llingüística del gallego-asturiano" y un novedosu "Cursu d'especialización en Filoloxía Asturiana (I)", empobináu esti últimu al profesoráu que cunta cola titulación de "Especialista en llingua asturiana" y col oxetivu d'afondar nos sos conocimientos.

La matrícula hai que la facer nel llar de l'Academia (Marqués de Santa Cruz, 6 - 2º d'Uviéu) ente'l 25 de mayu y el 5 de xunu, n'horariu de llunes a xueves de 9 a 15 hores y de 16 a 19. Los vienres l'horariu ye de 9 a 14 hores.

Más información nel teléfonu 985211837 o nel corréu alla@asturnet.es

Contador Estadistiques