El xulgáu archiva la denuncia d'Andecha Astur contra la Zalia por desapaición d'horros

El xulgáu d'instrucción númberu 3 de Xixón decidió declarar el sobreseimientu provisional de la denuncia presentada por Andecha Astur contra la Zona d'Actividaes Lloxístiques y Industriales d'Asturies (Zalia) con motivu del desaniciu d'horros en San Andrés de los Tacones (Xixón). "De lo actuao nun apaez debidamente xustificada la realización del delitu", establez el sobreseimientu. La resolución señala la posibilidá d'interponer recursu n'apellación nel plazu de cinco díes siguientes a la so notificación.
 
Andecha Astur, al traviés d'una nota prensa, llamentó que'l xuez "nun se molestare" n'atropar información al Ayuntamientu de Xixón ni a l'Asociación de Vecinos de San Andrés. La decisión, según la organización política, "pon n'evidencia l'absoluta impunidá de la que gocen los atentaos contra'l Patrimoniu Históricu y Etnográficu asturianu, por muncha que seya l'alarma social xenerada".
 
Foi'l 20 febreru cuando Andecha Astur presentó denuncia contra la emrpesa Zalia SA por un supuestu delitu contra'l Patrimoniu Históricu pola desapaición de dellos horros y paneres catalogaos nos terrenos tomaos por esta empresa na parroquia xixonesa de San Andrés de Los Tacones.
 
Andecha Astur tamién criticó que se decidiere'l sobreseimientu provisional de la causa sin practicar la mayoría de les dilixencies solicitaes na so denuncia. Poro, dixeron que tán estudiando la mayoría de les dilixencies solicitaes na so denucnia. Poro, dixeron que tán estudiando la posibilidá de presentar recursos d'apellación. "Lo que mos preocupa más tovía, qu'empreses de capital públicu como Zalia actúen con total impunidá destruyendo'l patrimoniu heredáu de tolos asturianos cola connivencia de les autoridaes competentes", acabaron.