La Xunta pola Defensa de la Llingua Asturiana valora "mui positivamente" la iniciativa del Partido Popular de presentación d’una proposición non de llei pa la incorporación de la especialidá de Llingua Asturiana nel sistema educativu. Esta iniciativa foi presentada ayer y pretende que profesores d'asturianu cuenten con "idéntiques garantíes llaborales y profesionales que'l restu".

Segun la XDLLA "esta proposición non de llei fai rescamplar l’escenariu de marxinalidá y inestabilidá na que s’atopa la llingua asturiana nos centros d’enseñanza. Una situación llamentable que ye hora de cambiar y qu’afecta por igual a los derechos educativos de los y les estudiantes como a los derechos llaborales de los y les trabayadores docentes".  

Asimesmo, esta iniciativa "evidencia que la defensa del patrimoniu llingüísticu asturianu sigue avanzando pel camín de xenerar consensos amplios y plurales y de sumar a ella a tolos sectores políticos y sociales".

Finalmente la Xunta pola Defensa de la Llingua Asturiana quier facer "un llamáu a los partíos políticos representaos na Xunta Xeneral, a aquellos que formen parte del Gobiernu y a tolos axentes sociales representaos na Educación, a que trabayen solidariamente pa garantizar la presencia digna y non discriminatoria de la llingua asturiana nel sistema educativu".