El Sindicatu Unitariu Autónomu de Trabayadores de la Enseñanza d'Asturies (Suatea) valoró enforma la iniciativa del PP na Xunta Xeneral a favor de la creación de la especialidá de Llingua Asturiana nel sistema educativu. Recordó, de la mesma manera, que los otros grupos representaos na cámara, IU y PSOE, caltuvieron "nun momentu o otru, postures asemeayes a ésta, y afalólos a votar a favor de la iniciativa".

   Nun comunicáu tituláu 'Tiempos d'esperanza pal asturianu', al que tuvo accesu Europa Press, Suatea consideró que "la ufierta del grupu parlamentariu del PP ye una mano tendida a la memoria histórica del los grupos de la Xunta Xeneral. Toos, nun momentu o otru caltuvieron postures asemeyaes a lo que propón agora'l PP. Esperamos que la coherencia tea per enriba de les rivalidaes polítiques, y qu'aquellos que teóricamente nos representen lo faigan de verdá aprobando la proposición".

   El sindicatu recordó que "hai agora un añu'l Conseyu Escolar del Estáu aprobó, por pidimientu de SUATEA, la creación de la especialidá de Llingua Asturiana y Gallego-Asturiano". Amás, señaló qu'organismos europeos "solicitaron mayor proteición pa esta llingua", y añadió que "la Universidá apostó colos cursos d'espertos y especialistes; agora cola especialidá dientro de los planes d'estudiu".

   "Y a pesar d'esto", sigue'l comunicáu, "el profesoráu atópase con que nun ta reconocida la so especialidá nos cuerpos docentes al mesmu nivel y colos mesmos efeutos llegales y llaborales que les demás especialidaes".

   Pa la central educativa, "el Gobiernu asturianu tien base abondo pa crear la Especialidá, como lo demuestra l'informe xurídicu de Leopoldo Tolivar, y amás la Llingua Asturiana y el Gallego-Asturiano son les úniques llingües que siendo área curricular, nun tien especialidá".

   Pal sindicatu, "les places d'Asturianu y Gallego-Asturiano teníen que pasar a formar parte de la plantiya orgánica y ser vacantes col estatus de places de plenu derechu a tolos efeutos". "Trátase d'un pasu fundamental pa garantizar y dignificar la presencia de la nuestra llingua nel sistema educativu asturianu", señaló'l comunicáu.   

   La organización sindical recordó que foi "la única qu'entrugó qué diba asoceder coles places de Llingua Asturiana y Gallego-Asturiano, cuando l'Alministración presentó la plantiya orgánica pal cursu 2008-2009. Pero asina y too nun entraron en plantiya orgánica".