La Fiscalía aprecia irregularidaes na actuación d'Ovidio Blanco nel plan de Cabueñes (Xixón)

La Fiscalía del Tribunal Superior de Xusticia d'Asturies (TSXA) apreció irregularidaes na actuación del ex arquitectu municipal de Xixón Ovidio Blanco, qu'algamó una plusvalía de 600.000 euros cola compraventa d'una parcela afeutada pol Plan de Cabueñes. El fiscal, Joaquín de la Riva, tien previsto unviar decretu de denuncia pola "supuesta comisión de delitos contra l'Alministración Pública", al xulgáu d'instrucción correspondiente de Xixón, pa qu'instruya'l casu. De la mesma manera, va pidir la declaración énte'l xulgáu del ex arquitectu municipal.

   La resolución de la fiscalía va comunicase amás al Ayuntamientu de Xixón, a la Platafomra Ciudadana contra la Muria de Cabueñes y al grupu municipal del PP de Xixón.

   De la Riva espeya nel decretu qu'hai un "innegble" beneficiu algamáu pol denunciáu cola compra de la finca realizada'l 13 de marzu de 1992 y la so posterior venta, en cuantía superior a los 600.000 euros. Destaca tamién les "repetíes" compres y ventes de la mesma finca a la empresa Hoyant, qu'algama tamién plusvalíes que superen los cinco millones euros.

SOBORNU Y TRÁFICU D'INFLUENCIES

   Estos fechos, según el fiscal, apunten a posibles delitos de sobornu y/o usu d'información privilexada y/o tráficu d'influencies, teniendo en cuenta que'l denunciáu, dende los cargos d'arquitectu superior, primero, y xefe del Serviciu Técnicu d'Urbanismu del Ayuntamientu de Xixón, dempués, yera conocedor, de "manera práuticamente esclusiva", del urbanismu xixonés, y en concreto de les probables recalificaciones de terrenu de delles zones del Conceyu de Xixón, nes que se diba desarrollar, a cortu o mediu plazu, proyeutos de desarrollu urbanísticu.

   De la Riva caltién qu'esi conocimientu de "tan valiosa información", como ye la compra d'un terrenu non urbanizable nun principiu, y la so posterior inclusión nel sector de suelu urbanizable 'Universidá-Cabueñes' y la so posterior venta col algame d'una "enorme" plusvalía, obliga a investigar los delitos anteriormente enunciaos, "por si hubo facilitación d'información urbanística a cambiu de recibir una contraprestación o influencia de dalguna manera en quien tenía encomendada l'adautación del Plan Xeneral d'Ordenación Urbana (PGOU).

LOS FECHOS

   Ovidio Blanco Suárez tomó posesión nel Conceyu de Xixón de la plaza d'Arquitectu Superior el día 2 de xunetu de 1979. Tres una escedencia voluntaria concedida con efeutos de 1 d'agostu de 1981, prestando servicios na categoría d'Arquitectu Superior, hasta'l día 1 de febreru de 1992 en qu'ocupó, en comisión de servicios, el puestu de Xefe del Serviciu Técnicu d'Urbanismu del Ayuntamientu de Xixón, puesto que se-y axudica pol procedimientu de llibre designación, el día 1 de xunu de 1992.

   El 13 de marzu de 1992, mediante escritura pública, y n'unión de la so esposa María Piedad Rodríguez Casado, merca a la empresa de promoción d'inmuebles, Hoyant SL, una finca de 2.491,91 metros cuadraos, al preciu de 7.513 euros, la cual se segrega d'otra denominada La LLosona, de 25.772,43 metros cuadraos, que merca a María del Carmen de Vereterra y Polo n'avientu de 1991, cuando tien una calificación de suelu non urbanizable, finca sita nel barriu de La Pontica, parroquia de Cabueñes, Conceyu de Xixón. La empresa Hoyant SL la componen Horacio Costales d'Arriba y Antonio Cueto Gancedo.

   El 26 d'ochobre de 1998, María Piedad Rodríguez Casado y Ovidio Blanco Suárez, "sin una aparente xustificación", según el fiscal, revienden a Hoyant la finca mercada'l 13 de marzu de 1992, pol preciu de 8.414 euros.

   Por resolución de l'Alcaldía de Xixón de 4 de payares del 2002, se merca a Pau lander SL l'asistencia técnica pa l'adautación del PGOU de Xixón. Por acuerdu del Ayuntamientu de Xixón de 16 d'avientu del 2003, se procede a l'abertura del trámite d'información pública por plazu d'un mes del documentu d'adautación del PGOU de Xixón.

   El día 1 de xineru del 2004, Ovidio Blanco Suárez pasa a la situación d'escendencia voluntaria. De la mesma manera, por escritura pública de fecha 29 de xunetu del 2004, y cuando yá yera público que tola estensión de la finca de La Llosona diba pasar a tener la condición de suelu urbanizable, Horacio Costales de Arriba y los herederos d'Antonio Cueto Gancedo, que morriere'l 26 d'abril de 1999, vienden de nuevo a Ovidio Blanco Suárez y a la so esposa la finca de 2.491,91 metros cuadraos, dixebrada nel so día de La Llosona y que mercare a Hoyant el 13 de marzu de 1992 y volviere a vendela a Hoyant el 26 d'ochobre de 1998, esta vez en 20.434 euros, a razón de 8,20 euros el metru cuadráu.

DERECHU D'OPCIÓN DE COMPRA

   N'escritura pública de fecha 11 de xunetu del 2005, Ovidio Blanco y la so esposa, conceden un derechu d'opción de compra sobre la repetida finca, a la vez que los titulares rexistrales d'otres trés finques más, a la entidá inmobiliaria Urbis, pol preciu de 90.150 euros.

   En dicha escritura se recoyíen que "la validez y la eficacia del derechu d'Opción de Compra, queda condicionada a que, con anterioridá al día 11 de xunetu del 2006, quede definitivamente aprobada la revisión del plan de Xeneral d'Ordenación Urbania de Xixón, nesti momentu en tramitación, de manera que'l sector nel que s'alcuentren incluyíos los terrenos oxetu del presente contratu-y correspuendan los parámetros urbanísticos que quedaron señalaos na escritura que motiva esti asientu".

   Tamién se recoyíen na Escritura que "el preciu global y definitivu de la compraventa va ser el que resulte de multiplicar la superficie de caúna de les finques oxetu de la compraventa, por 240,40 euros por metru cuadráu de suelu", rebaxáu no abonao como preciu de la opción.

   N'Escritura Pública de fecha 26 de xineru del 2006, Ovidio Blanco y María Piedad Rodríguez Casada, vienden la entidá inmobiliaria urbis por 617,420 euros la finca anteriormente señalada. Xunto con Ovidio y la so esposa, na mesma escritura, declara tamién a Horacio Costales de Arriba, que lo fai nel so propiu nome y tamién como alministrador únicu Hoyant SL.

   Como tal alministrador viende a Inmobiliaria Urbis la finca La Llosona, incluyida nel ámbitu del sector de suelu urbanizable UZN-C.1 (S) 'Universidá-Cabueñes', del PGOU de Xixón aprobáu definitivamente pol plenu del Conceyu de Xixón con fecha 30 d'avientu del 2005, igual que la que viende Ovidio Blanco y la so esposa. Por dicha venta, Hoyant recibe 5.704.798,48 euros.

   El 28 de xunu del 2007, presenta Ovidio Blanco, ante l'Ayuntamientu de Xixón, el documentu correspondiente al Plan Parcial de Cabueñes, en representación de Lomas Barajas SL, Reyal Urbis SA y Promesa, documentu firmáu pol propiu Ovidio Blanco y otra colexada.