Bloque por Asturies diz que la moción del PP sobre la especialidá del asturianu busca una "resquiebra" nel Gobiernu
|
10 Xunu, 2009 por E.P. / Redacción
- Inicie sesión o rexístrese pa espublizar comentarios
El voceru del Bloque por Asturies, Pablo Fernández, pidió al Partíu Popular que seya "coherente colo que diz" porque piden la creación d'especialidá del asturianu, cuando "son los primeros que criminalicen a los que defenden la llingua".
Según Fernández, la intención del PP con esta propuesta ta más nuna llinia destructiva que constructiva, a pesar de les sos apariencies. Dende'l Bloque, consideren que la propuesta va más cola idea de que "cuanto peor, meyor", porque lo que busquen ye tentar de "facer una resquiebra nel Gobiernu d'Asturies".
"El PP usa l'asturianu pa pone-y una boina a Gabino de Lorenzo (alcalde d'Uviéu) o pa criminalizar a los que defenden el so usu", espresó'l voceru del Bloque, y añadió qu'ellos tán d'acordies cola propuesta del Partíu Popular, pero nun ye creíble pol que la presenta.
"Ye una contradicción, porque lo que busca nun ye que s'apruebe la especialidá docente, sinón abrir una brecha nel Gobiernu, y lo diz xente que ta siempre a la escontra del asturianu y que mos comparen col 'abertzales' o etarres", recalcó'l voceru del Bloque.
Pablo Fernández señaló que dende'l Bloque por Asturies, conviden al Ayuntamientu d'Uviéu a qu'apruebe la toponimia o a crear la oficina del serviciu de normalización llingüística, dao qu'estos dos fechos "diben avalar la postura que tenten de treslladar dende'l PP a la opinión pública".
"El día qu'entiendan la defensa del asturianu como un exerciciu llexítimu y un derechu humanu, esti país va tener domesticao a una de les clases dirixentes más salvaxes y más antidemocrátiques que tien Asturies", apuntó'l voceru del Bloque por Asturies.
Efrén d'Andrés
Comentarios
La última frase ye un poco confusa. ¿A quién se refier, al PP o al PSOE?
Lo malo que tienen los políticos asturianos ye que nun se casen nin con dios, y asina mos va.
Si esto mesmo pasa en Cataluña voten col PP pa que'l PSOE esconsone. Y depués voten col PSOE pa da-yos en cara al PP, y llueu voten a otra vuelta col PP, y llueu col PSOE, y llueu col PP.... Pero equí non, por dios!!! Nun vaya ser que cola derecha mos pase daqué. Miren pola parcelina d'ellos.
Pues nun "gobernó" primero Pujol con Gonzalez y bien llueu con Aznar? Y el PNV tamién?
Y quién ganó? Cataluña.
Según informa esti mesmu diariu dixital el pasáu día nueve, esta proposición ye "pa esixir la execución d'una midida plangegada pola Plataforma de Profesores de Llingua Asturiana y polos sindicatos". D'otru llau, la Xunta Pola Defensa de la Llingua valoró tamién hai díes positivamente esta propuesta que se va llevar el vienres a la Xunta. Sería una bona noticia que saliere adelantre, pero paez que va ser que non.
Qu'impresentables son estos del Bloque, la especialidá llevabenla nel pactu cola FSA asina que lo que deberían de facer ye aprobar la proposición por unanimidá, son tan patéticos que nin siquiera s'atreven a plantea-ylo a los del PSOE y sueltennos estes pih.aines como si fueramos bobos.
Y mientres, con esti gobiernu de la izquierda "plural" vemos coses como'l desaniciu de la programación n'asturianu na RPA ensin que naide gurgute.
Rosa Díez en Llanes: “la llingua oficial d’Asturies ye’l castellán y lo demás son dialectos” y comentó tamién que busca “implantase bien n’Asturies”. Lo pior ta por venir, gracies a los partios asturianos, ta entamando a llegar el facismu puru y duru de la derecha española y de xuru que faen bonos collacios na FSA que tamién hai abondo facistes. Nuestra identidá como pueblu tien los dies contaos.
Nun vos esmolecer por UPyD, nun veis que diz Jesús Iglesias que eso ye "el votu friki".
Bueno, vienen dicir que van votar que non. Por eses mesmes razones si'l PP mañana pidiere la oficialidá tamién habría que votar que non. Nun entiendo por qué una mesma reivindicación ye mala o bona independientemente del que la proponga. ¿Que ye por estratexa política?, pues sí, como too en política, el que piense que la política nun ye estratexa nun sabe lo que ye la política, ande que nun se llograron coses gracies a la estratexa política y los equilibrios parlamentarios, anda que non.
Gabis
Na más quiero dicir una cosa: si votar voten los de IX /bloque que non a esto, la poca credibilidá que-yos quedaba va dir a tomar pol sacu, y yo, dende llueu, nun pienso volver a votalos na puta vida. Dicho ta.