Un colectivu de trabayadores del Caudal convoca una manifestación contra la situación llaboral na comarca minera

Un colectivu de trabayadores de la comarca del Caudal convocó una manifestación pal próximu vienres 12 de xunu col oxetivu de lluchar contra la "indefensión de la población en xeneral ante l'avalancha de despidos y regulaciones d'emplegu", que recordaron, qu'afeuten a toa Asturies, y más concretamente, a les cuenques mineres. Los miembros d'esta formación decidieron crear esti colectivu, dende'l que güei se criticó a los partíos políticos porque, na so opinión, "nun se supo dar respuesta a les necesidaes de los ciudadanos".

   La falta de fiscalización del dineru de fondos mineros foi otra de les cuestiones denunciaes por estos trabayadores, que demientres una rueda prensa na que lleyeron un comunicáu puxeron como exemplu del "fracasu de la reindustrialización prometida" la situación qu'atraviesen empreses como Diasa, Alas, Triman, Kerkus, Rioglass o Enferbus. N'opinión d'esti colectivu, estes firmes demuestren "l'engañu de la continua reconversión na que tamos somorguiaos", dao que, apuntaron, "la mayoría tán mui sovencionaes".

   Les crítiques d'esti grupu, formáu por trabayadores afeutaos por ERE o sensibilizaos colos problemes de los sos compañeros, tamién se centraron nos sindicatos mayoritarios, a los qu'acusaron de "complicidá y silenciu" y de desarrollar una "política de pactismu". Nesti sen, el colectivu de trabayadores de la cuenca del Caudal dexó claro que se trata d'una formación que "trata d'aconceyar a toos en defensa d'unos intereses comunes a la mayoría", y que ye ayenu a cualquier interés partidista".

   La primer midida tomada por esta formación foi precisamente la convocatoria d'una manifestación que va salir el próximu vienres día 12 de xunu a les siete la tarde dende la plaza de la Pasera, frente a la ilesia de San Xuan de Mieres. A ella tán convidaos tolos ciudadanos, "independientemente de la so afiliación o creencia" y, nesi sen, pidieron que nesta cita "les sigles queden a un llau".