IU diz que'l Palaciu de Xusticia va tener "un aumentu de coste" d'ente 89 y 111 millones, un 250% más de lo previsto

|

El secretariu xeneral d'IU d'Asturies, Jesús Iglesias, y el coordinador d'IU d'Uviéu, Alejandro Suárez, aseguraron que los asturianos van pagar un 250% más de lo que debíen pol Palaciu de Xusticia, dao que "según dellos estudios", el preciu que debía costar asciende a 78 millones "una cantidá bastante lloñe de los 176 millones d'euros que se van pagar". La formación va tratar esti "nuevu desacuerdu" col PSOE nel próximu conceyu d'evaluación del pautu de Gobiernu.

   "Tamos de nuevo nun escesu de coste, espresión que yá caracteriza nos proyeutos d'Areces, d'ente 98 y 111 millones, sin contar los intereses", dixo Suárez, qu'añadió que nun cálculu moderáu'l Principáu va pagar unos 12 millones d'euros al añu d'alquiler una vez entregada la obra.

   En rueda prensa, los dirixentes de la coalición nun aforraron en crítiques hacia l'acuerdu ente'l Principáu y la empresa Jovellanos XXI pa la construcción d'un Palaciu de Xusticia na parcela d'El Vascu, y aseguró que los datos qu'ofrecen "son comprobables dafechu".

   Según los estudios que manexa IU --en base a constructores, estudios del INE y del Bancu d'España ente otros--, el preciu del metru cuadráu pa una construcción d'esti tipu ye de 1.299 euros, colo que'l palaciu diba costar un preciu máximu de 78 millones d'euros, eso sin l'habitual rebaxa de l'axudicación pública.

   "Pero ye qu'amás nun tamos teniendo en cuenta'l preciu del suelu, los seis millones qu'a Jovellanos XXI costó-y el regalu del alcalde d'Uviéu, Gabino de Lorenzo", dixo Suárez, qu'indicó que'l Palaciu de Xusticia de Xixón, subastáu con IU na Conseyería de Xustica, ye asemeyáu al que va haber n'Uviéu y costó 25 millones, colo que multiplicando pol espaciu'l preciu del d'Uviéu diba ser de 65 millones d'euros.

   Nesti sen, Suárez aseguró que "con muncho menos de lo que ta sovencionando a Jovellanos XXI diba acabase mañana cola llista d'espera d'atención a la Dependencia".

ESCURA LLEGALIDÁ

   Pero amás del "aumentu de coste", IU refirióse tamién a la "ausencia d'un procesu d'axudicación normal y llegal, como ye la subasta pública de llibre de participación", colo qu'al so xuiciu hai una "escuridá llegal".

   Nesti sen Jesús Iglesias afirmó que la fórmula llegal elixida ye "discutible y como mínimo va refugala la Sindicatura de Cuentes".

   "N'Asturies la llotería toca siempre a los mesmos y hai empresarios nel Principáu que nunca cuerren nengún peligru", dixo Iglesias.

   Jesús Iglesias insistió en que la so formación nun entiende la urxencia cola que se trató esta decisión y considera que nuna situación económica como l'actual hai otres prioridaes. Amás, destacó l'asitiamientu ideal que pa la Ciudá de la Xusticia siguen siendo los terrenos d'El Cristo, que van lliberase una vez se tresllade l'Hospital.

   "Eso diba significar un retrasu de dos años, pero creo que dos años y mediu más nuna instalación así diben ser asumibles dafechu", dixo Iglesias, qu'indicó que l'aforru económicu diba xustificar la espera. Amás afirmó que'l Palaciu diseñáu pa El Vascu nin siquier tien capacidá p'acoyer la sede del Tribunal Superior de Xusticia d'Asturies, TSXA, mientres que n'El Cristo diba haber capacidá pa toles sedes xudiciales.

ACUERDU DE GOBIERNU

   Entrugáu por si esta nueva diferencia ente'l PSOE y IU pue ser un motivu que provoque la rotura del acuerdu de Gobiernu, Iglesias afirmó que va haber qu'esperar al conceyu de siguimientu que se va celebrar "nes próximes trés selmanes" p'analizalo.

   "En menos de trés selmanes vamos poder evaluar la salú del acuerdu y vamos poner sobre la mesa los desacuerdos y el cumplimientu de los acuerdos incluyíos nel pautu", acabó Iglesias.

 

Comentarios

Vamos ver, ¿IU ta nel gobiernu o nun ta nel gobiernu?, pues si tan nel gobiernu, pues que gobiernen y que dexen de sacar comunicaos.

Gabis

Contador Estadistiques