El Conceyu de Villaviciosa entama'l "II Certame de Pintura"

El 10 d’agostu ábrese’l plazu de receición d’obres pa la XII edición del Certame de Pintura 2009 – Ilmu. Conceyu de Villaviciosa. Esti añu, con una importante novedá, l’amiestu del Premiu Especial Fundación José  Cardín Fernández, dotáu con 1.500 euros y Diploma. La obra ganadora va pasar a ser propiedá d’esta Fundación. Una collaboración "que-y da un mayor puxu a la dotación económica del certame y afita’l so prestixu".

La cuantía económica de los premios del certame algama asina los seis mil  euros, repartíos ente’l Premiu Ilmu. Conceyu de Villaviciosa (3000 euros)  y los Premios Especiales de Caxastur y la Fundación José Cardín Fernández  (1.500 euros caún). Amás, el Certame "cunta con un Fondu pa Compra d’Obres gracies al aporte de Promociones y Construcciones José Glez S.A y Promociones Rivero Cueto S.A, de 1.500 Euros caún".

Les obres han apurrise ente’l 10 d’agostu y el 9 de setiembre, de llunes a vienres de 9 a 14 hores, nel Centru Cultural Capistrano (Cai Asturies 22 de Villaviciosa), en mano o per axencia de tresporte (nesti casu les obres tienen que dir embalaes con material reutilizable). Como nes ediciones anteriores, han ser obres orixinales y inédites, de cualesquier tendencia artística. Nun van almitise les que se presenten protexíes con cristal. La midida de la obra nun va pasar de 15 cms. Por cualesquier de los sos llaos, nin va ser de menos de 100x73 cms.

Van esbillase un mínimu de 18 obres pa la so muestra depués del fallu del concursu, nel prestosu espaciu espositivu de la Fundación José Cardín Fernández en Villaviciosa.Les bases enteres pueden descargase en www.villaviciosa.es, o pidise nel Centru Cultural Capistrano (985893423).