Google presenta n'Asturies la nueva ferramienta "Transit"
|
7 Agostu, 2009 por Pablo R. Alonso
- Inicie sesión o rexístrese pa espublizar comentarios
Asturies foi'l llugar escoyíu por Google pa presentar nel estáu "Google Transit", una nueva ferramienta de planificación de rutes en tresporte públicu. El nuesu país ye'l primeru nel Estáu n'incorporase a esti proyectu. Transit permite a una persona conocer la oferta de tresporte públicu pa dir d'un orixe a un destín, con horarios, recorríos y empreses qu'ufierten el serviciu. Al empar, describe los tiempos totales de desplazamientu a pie hasta la parada o terminal de tresporte, esperes, tresbordos y tiempu de viaxe per Asturies.
La presentación corrió a cargu del Conseyero de Mediu Ambiente, Ordenación del Territoriu y Infraestructures, Francisco González Buendía, y de la Directora de Marketing de Google pa España y Portugal, Laurence Fontinoy.
Según la responsable de Google "l'aplicación ye mui flexible en cuanto a les referencies que l'usuariu puede utilizar pa conseñar l'orixe y destín del viaxe, yá que funciona como un buscador: analiza les palabres incluyíes y gueta términos coindicentes, proponiendo, si ye'l casu, delles opciones pa qu'ún mesmo esbille la más afayadiza. Tamién proporciona información acerca del operador que realiza'l serviciu, y direcciona a la so páxina web, si existe".
L'accesu, que yá ta disponible, puede facese al traviés de Google Maps o al traviés de la páxina web del Consorciu de Tresportes d'Asturies.
Efrén d'Andrés
Comentarios
Yo quiero dir a La Feria Muestres, que ye como la Selmana Negra pero ensin noria, y con más bocadiellos, y en cuenta llibros sueltos, venden enciclopedies con CDs, naide superó tovía a la Feria Muestres, y yo soi fanáticu d'ella, por calidá, por preciu y por diversión, ehí tamién puedo xintar casadielles mientres lleo la Espasa y ensin necesidá de teoríes seudomoralizantes felizmente superaes, nada hai nuevo baxo'l sol de Xixón.
Gabis
Calla hom, lo meyor ye dir pelos puestos pidiendo pegadielles. Y nun falemos yá del globu d'Oquendo, eso sí que ye un clásicu.
Amás d'un clásicu ye una maravía, l'alegría de neños y mayores, el mundu faise más pequeñu na Feria Muestres, too ta al algame de los nuestros dedinos, espurres la manina, y comes un bocadiellu del Beluchistán, apúrresla un poco más y tamién hai un bon Rincón Llatinu pa qu'esa mano abra les puertes del Paraísu, por munchos cinchos que lu guarden, y ye que, ente caipirinha y caipirinha siempre hai un bon momentu pal archivu de la tresmisión oral de saberes y conocencies, ¿nun sabes como ye?
Gabis
Fai años que nun voy a la feria, de Oquendo alcuerdome, y de les cases prefabricaes con aire asturianu, del restu ni papa.