El grupu l.lenizu La Col.lá Propinde ta terminando de preparar lo que va ser el so tercer discu d’estudiu tituláu "A teyavana", un trabayu que cuenten con sacalú al mercáu a primeros d'esta seronda. Esti grupu asturianu amás va actuar el prósimu día nueve d’agostu en Valdesoto (Siero) y el 22 d’agostu en Xixón, nel Festival 5º40”, onde adelantarán dalgún de los temes nuevos.

Rafael Rodríguez Valdés (Uviéu, 1978) ta acabante d’asoleyar “Discursos llingüísticos y movimientu obreru na Asturies decimonónica” (Trabe, 2009). Esti historiador mozu yá publicare en 2004 “Llingua asturiana y movimientu obreru (1899-1937)” (Atenéu Obreru de Xixón). Asturies.com quixo falar con él d’esta nueva investigación, ganadora del Premiu “Fierro Botas“ d’ensayu en 2008.
 

La multinacional ArcelorMittal comunicó ayer a los sindicatos nel senu del conceyu del Comité de Siguimientu de l'Aplicación del ERE, la regulación de más de 1.600 operarios nes instalaciones d'Hojalata, el tren semicontinuu (TBC) y Estructura. Según informó'l presidente del comité d'empresa de les instalaciones y miembru d'UXT, Raúl Marquínez, lo anunciao nel conceyu ye muncho más negativo de lo esperao.

El grupu folk asturianu Xera, saca al mercau´l so segundu trabayu discográficu, tituláu "Tierra". Tres el primeru, "Lliendes", asoleyáu en 2006, Xera ufierta "una evolución na so llínia musical, ampliando los temes con voz y amestando nuevos instrumentos como la zanfona".Esti trabayu preséntase baxo llicencia Creative Commons by-nc-nd 3.0

El secretario xeral de Política Lingüística de la Xunta de Galicia, Anxo Lorenzo, ta acabante d'asoleyar los datos de la consulta que'l nuevu gobiernu gallegu del PP fixo nos últimos meses a les families de 330.856 alumnos sobre les preferencíes d'estes no que cinca al idioma de docencia na enseñanza. La mayoría escueye una educación mayoritariamente en castellán, seguido de la opción billingüe. La participación na consulta foi del 58,7 %.

Esti próximu llunes 3 d’agostu, a les 13:30 hores, nel Salón d’Actos de la Escuela-Hogar de Santantolín (Ibias), entamen los XXVII Cursos de Branu de l’Academia de la Llingua Asturiana (Cursos Elemental y Avanzáu de Llingua Asturiana, Cursos d’Afondamientu Cultural y Llingüísticu y 1ª Fase del Cursu de Capacitación en Gallego-Asturiano). Los Cursos desarrollaránse ente los díes 3 y 14 d’agostu y nellos van participar más d’un centenar de persones.

El presidente d'Asturies recordó que'l so gobiernu y el de Castiella y Lleón "fueron nel so momentu al Ministeriu d'Industria, onde confirmaron públicamente'l so apoyu a la llinia d'evacuación de Sama-Velilla, por interés xeneral de les dos comunidaes y d'España". Dixo amás que pela so parte Rede Eléctrica, faciendo les correiciones necesaries, meyoró'l trazáu de la llinia, y agora'l Gobiernu asturianu va siguir defendiendo incuestionablemente l'interés públicu que tien que prevalecer sobre cualquier otru.

L'Euríbor, tipu d'interés al que se referencien la mayoría que les hipoteques nel Estáu, pieslla'l mes de xunetu nel 1,4%, lo que significa cuatro puntos porcentuales menos qu'hai un añu y torna nun descensu de la lletra de 330 euros al mes, y unos 4.000 euros al añu.

Na reunión selmanal del Conseyu de Gobiernu aprobóse’l decretu qu’afita la nueva toponimia oficial del conceyu de Siero. Les nueves denominaciones, aprobaes pola Xunta de Toponimia y yá col preste del Gobiernu asturianu, pasen a tener la consideración de denominaciones oficiales.

El Conseyu de Gobiernu dio'l preste a una serie d'iniciatives empobinaes a l'adaptación de la Universidá d'Uviéu al Espaciu Europeu d'Educación Superior. D'esti mou aprobóse'l Proyectu de Decretu d'Enseñances Universitaries Oficiales y Centros y autorizóse la creación de 12 títulos de Grau y 15 títulos oficiales de Máster Universitariu.