Asturies va entamar la campaña de vacunación gripal en setiembre

La directora xeneral de Salú Pública d'Asturies, Amelia González, anunció que la campaña de vacunación pa la gripe estacional va emprincipiar el 21 de setiembre y va durar hasta'l 23 d'ochobre. Sicasí, esta vacunación ye la que se fai anualmente contra la gripe. La campaña de vacunación contra la nueva gripa A va facese cuando'l Ministeriu lo mande.

Amelia González afitó que nun saben hasta onde puede algamar la gripe nueva, pero se ta trabayando sobre escenarios "del 15, 30 y 50 por cientu de la población", por cuenta que dende'l Serviciu de Salú del Principáu d'Asturies creen que va haber un mayor númberu d'afectaos pol nuevu virus.

La directora xeneral de Salú Pública d'Asturies recomendó l'aplicación de la vacuna estacional a los grupos de riesgu, que son mayoritariamente persones mayores de 65 años y recordó qu'hai dellos virus de gripe actuando, nun solo'l nuevu, polo que l'amenaza de la gripe A nun tien que llevar a la población de riesgu a nun vacunase contra la estacional, por cuantes que si "gracies a la vacuna quitamos l'impactu de gravedá que pueden tener otru tipu d'infecciones, tamos ya faciendo muncho trabayu".