El PP esixe al Gobiernu asturianu esplicaciones pola "alarma" sobre'l futuru la sanidá

El presidente del PP, Ovidio Sánchez, afaló al Gobiernu del Principáu, en particular al so presidente, el socialista Vicente Álvarez Areces, a que vaiga a la Xunta Xeneral pa esplicar los problemes relativos a la sanidá asturiana. Al paecer de Sánchez, Areces tien de facelo "darréu", por mor de la "alarma" que ta surdiendo ente los ciudadanos sobre'l futuru de la sanidá y los sos problemes presupuestarios.

   Sánchez fizo estes manifestaciones nel trescursu d'una rueda prensa ofrecida n'Uviéu, onde tuvo acompañáu polos diputaos Alejandra Cuétara y Carlos Galcerán. De nun ser convocáu un plenu estraordinariu por parte del Executivu p'abordar los supuestos problemes presupuestarios de la Sanidá y les sos posibles soluciones, Ovidio Sánchez señaló que'l so partíu lo exixirá na Cámara'l día 1 de setiembre.

   El cabezaleru asturianu del PP dixo que'l so partíu ta dispuestu a collaborar en tolo que seya necesario, pero amosó dafechu'l so refugu a fórmules como la del copagu na sanidá asturiana. Acusó al Executivu d'intentar culpar a los ciudadanos d'un problema que crearon los xestores del sistema de salú n'Asturies. Tamién criticó a l'Alministración por "culpar" a los mélicos.

   Calificó, amás, de "macabra tomadura de pelo" que'l Gobiernu asturianu fale de penalizar a la xente qu'acude a urxencies davezu y a esgaya. Esa midida, según Sánchez, podría producir consecuencies "catastrófiques" y nun tien sentíu nun momentu, amás, nel qu'esiste una pandemia de gripe A. "La xente nun va por gustu a Urxencies", argumentó.

   Carlos Galcerán recordó que la Xunta Xeneral del Principáu aprobó hai unos meses una proposición non de llei onde se refugaba'l copagu, y qu'amás los ciudadanos contribuyen yá al traviés del impuestu sobre los hidrocarburos, conocíu como 'céntimu sanitariu'.

FINANCIACIÓN

   Ún de los problemes fonderos, acordies con Ovidio Sánchez, ye que'l Principáu d'Asturies tuvo que conformase con un alcuerdo de financiación autonómica que nun cubre nin siquiera servicios esenciales. Criticó que'l Gobiernu rexonal s'amosase satisfechu col alcuerdo y qu'agora diga que tien problemes pa pagar la sanidá, cuando esti yera ún de los aspectos cimeros a la hora de negociar. Al so paecer, el Gobiernu del Principáu nun defendió los intereses de los asturianos na negociación, sinón los del PSOE, polo que "cedió" a les órdenes de Ferraz.

   Sicasí, recordó que l'alcuerdo sobre'l nuevu modelu de financiación autonómica, entá tien que pasar pol Congresu de los Diputaos, polo que fizo unos llamamientos a los diputaos por Asturies pa que lu refuguen, yá que ye "perxudicial" pa rexones como'l Principáu y namái beneficia a comunidaes como Cataluña.

   El PP tamién considera que los presupuestos tán "mal fechos", cuestión de la que responsabilizó al conseyeru d'Economía y Facienda, Jaime Rabanal, y al de Salú y Servicios Sanitarios, Ramón Quirós.

CHIRINGUITOS

   Nesti sen, Alejandra Cuétara, dixo que los "chiringuitos socialistes", no que cinca a sociedaes, organismos autónomos y entes públicos, suponen un "gastu superfluu" del que se tenía de  prescindir. Asina, esplicó que los gastos d'esplotación de los mesmos medraron un 131 por cientu dende l'añu 2003, con un incrementu en cifres absolutes de 281.654.772 euros.

   Cuétara comentó qu'esi incrementu supón que los gastos de funcionamientu xorrecieron a un ritmu añal de dalgo más de 40 millones d'euros. Tamién faló d'un aumentu nos gastos de personal en sociedaes públiques dende l'añu 2001 al 2009, que supunxo un incrementu de 15.918.802 euros.

   Ovidio Sánchez consideró "increyible" que nun haya dineru pa la sanidá, pero sí pa caltener puestos de trabayu de "collacios socialistes" nesi tipu de "chiringuitos".