Softastur espubliza la traducción al asturianu d'Akregator

Softastur acaba d'espublizar la traducción a llingua asturiana d'Akregator, dientro del so proyeutu de software llibre. Akregator ye un amestador de noticies llibre, compatible con feeds (suministru de datos) en formatu RSS y Atom, que permite tar al día de los cambeos nos blogs a los que l'usuariu tea soscritu. Too ello cola interface en llingua asturiana.

Esti programa anova l'estáu de los blogs a los que tea soscritu el llector. Si hai dalgún cambéu nel sitiu en concretu, Akregator avisará d'esi cambéu. Esta iniciativa parte de Softastur, un colectivu ensin ánimu de lucru formáu por programadores, alministradores de sistemes, profesores y traductores n'asturianu.