Un proyectu d'Atles de los Bolos Asturianos ábrese a la collaboración ciudadana

L'Atles de los Bolos Asturianos ye proyectu recién aprobáu pola Conseyería de Cultura na so llinia d’investigaciones sobre Asturies, nel que se busquen datos que permitan trazar delles variables influyentes pa la confección d’un atles que dea desplicación a la bayura bolística asturiana. Esta investigación, empobinada por Carlos Suari, cuenta cola aprobación de científicos de prestixu d’universidaes de Cataluña, País Vascu, Castiella y Asturies y d’axentes de la rede deportiva de los bolos.

Según Suari "anque’l norte del Atles ye correlacionar etnoxeografía colos rasgos internos d’estos xuegos, ente los sos oxetivos tamién tán ampliar el volume d’información sobre los bolos asturianos y la enmienda de dalgunos errores persistentes nos trabayos previos, mesmo na coyida de los datos que na so interpretación científica".
 
Dende esti proyectu pídese a "toles persones que quieran facer dalgún comentariu, que tengan dalgún datu (del tipu que seya) o anécdota sobre cualesquier modalidá asturiana de bolos o que conozan a terceres que puedan aportalos, cuenten con unes señes electróniques de contactu bolosasturianos@gmail.com  y un llugar de discutiniu y coordinación en Facebook". Asinamesmo, "valórense especialmente les recomendaciones sobre llugares d’interés pa visitar o les puntualizaciones sobre los trabayos bolísticos asoleyaos hasta la fecha".

Les persones qu’aporten cualesquier información al Atles apaecerán, siempre que-yos preste, na nómina de collaboradores del proyectu y recibirán una copia dixital del trabayu cuando tea rematáu, a finales d’añu.