Valledor diz qu'Areces tien qu'asumir la so responsabilidá pol sobrecoste d'El Musel y dimitir

El diputáu d'IX-BA-Verdes na Xunta Xeneral del Principáu, Francisco Javier García Valledor, dixo que'l presidente del Principáu d'Asturies, Vicente Álvarez Areces, tien de facer de so la responsabilidá pol sobrecoste'l enanchamientu del Puertu El Musel (Xixón) y dimitir por una xestión que significó "qu'Asturies pierda más de 250 millones d'euros".

   La obra d'ampliación del Puertu El Musel fue axudicada nunos 580 Millones d'euros. Posteriormente, l'Autoridá Portuaria de Xixón reconoció un sobrecoste de más de 215 millones d'euros. Depués de que la Comisión Europea refugare la petición de 135 millones, el Gobiernu d'España y el Principáu acordaron una salida que consiste na petición d'un préstamu de 215 millones per parte de l'Autoridá Portuaria.

   Valledor recordó qu'esti mesmu fin de selmana'l propiu ministru Fomentu, José Blanco, dixo que tol mundiu tenía de facer un esame conciencia pa que nun se repitan los sobrecostes d'El Musel. Amás, dixo que dende la Federación Socialista Asturiana (FSA)-PSOE tamién se tán pidiendo responsabilidaes polo asocedío.

   Al paecer de Valledor, ye motivu satisfaición que los socialistes pidan responsabilidaes polo ocurrío na xestión d'El Musel. El diputáu d'IX-BA-Verdes recordó que la Xunta Xeneral del Principáu pidió n'ochobre y al traviés d'una moción a Areces el cese del presidente de l'Autoridá Portuaria de Xixón a Fernando Menéndez Rexach. "Al nun destituyilu, Areces fízose responsable d'esa xestión", esplicó Valledor.

   Amás de la dimisión d'Areces, Valledor dixo que tamién teníen de dexar los sos cargos el conseyeru de Mediu Ambiente, Ordenación del Territoriu ya Infraestructures, Francisco González Buendía, amás de Rexach.