El sindicatu d'enseñanza SUATEA afita que "l'aumentu n'Asturies de 1.921 alumnos, un 1,56% respective del cursu anterior, anunciáu pola Conseyería d'Educación, ta acompañáu d'una disminución del profesoráu contratáu p'atendelos". Según el sindicatu tan amenorgando les hores que s'utilizaben p'apoyos, dexando "d'atender los casos del alumnáu que necesite especial atención, perxudicando una eficaz atención a la diversidá" d'estos.

Asimesmo "elimínase personal de los equipos d'orientación, que ye l'encargáu d'evaluar los casos del alumnáu con necesidaes específiques y orientar sobre les pautes d'actuación con esti. Esto incluiría evaluar a alumnáu d'altes capacidaes, estranxeros de nueva incorporación, o alumnáu con discapacidaes". Pa disminuir daqué más el númberu de docentes xeneralízase la impartición "d'asignatures afines en secundaria y formación profesional, esto ye, que'l profesoráu dea clases de materies que nun son la so especialidá".

Finalmente SUATEA conseña que la Formación Profesional, "la gran vencedora nel repartu d'alumnáu, ye tamien una de les vencedores na disminución de profesoráu" pente la "impartición d'asignatures afines, eliminación de dalgún ciclu pa concentrar al alumnáu n'otros, aumentu de les hores llectives de cada profesor, son les mismes recetes que se tan aplicando nel restu d'etapes".