Dende'l Conceyu por Otra Función Pública n´Asturies recuerden que'l "14 de setiembre el Tribunal Superior de Xusticia d´Asturies sacudio-y al Gobiernu asturianu otru estacazu asemeyáu al que-y diere’l pasáu mes de xunu cola anulación de la mal llamada 'carrera profesional'" y acusen al executivu asturianu d'intentar manipular a la opinión pública nesti asuntu.
 
Nesti casu, amesten, "pente medies del refuge pola Sala de lo contencioso–alministrativu del recursu n´interés de llei que’l Gobiernu d´Areces interpusiere escontra la Sentencia del Xulgáu de lo contencioso–administrativu nu 5 d´Uviéu, que reconoz el drechu de los trabayadores con cinco años d´antigüedá y que nun teníen robláu’l 'cheque en blancu' preellectoral, a cobrar el complementu de productividá. Esta sentencia yá ye firme y estensible a tolos emplegaos públicos".

Por ello, afiten que "paez nidio, polo tanto, l´argayu completu del plantegamientu clientelista del Gobiernu. Por embargu, lloñe de reconocer la realidá y actuar en consecuencia, llanzóse de calón a una intensa campaña mediática pa tapar la derrota, na que pretende facese pasar como arrogante benefactor d´aquellos trabayadores que nun aceptaron la so oferta de perres, dexando entrever que-yos dará otra oportunidá p’apuntáse".

El Conceyu por Otra Función Pública n´Asturies afita que se "trata sólo d´una maniobra de despiste y confusión, empobinada a presentar como concesión graciable lo que ye güei un drechu xudicialmente reconocíu. Lo qu´agora resulta yá imposible ye facer una nueva convocatoria pa la firma d´otru 'cheque en blancu' – pagu a cambiu d´unes condiciones ocultes -, que ya fue refugada por illegal pela Xusticia, por muncho que la quieran envolver col mantu d´una llei".

Finalmente conseñen que "la única solución almisible, nesti momentu, ye la de llegalizar el pagu del complementu de productividá pa tolos trabayadores en condiciones d´igualdá, sin amestu voluntariu dalu a una 'carrera profesional' qu´entovía nun esiste, cumpliendo bonalmente con ello les decisiones xudiciales".