La Fundación Oso Pardo diz que Fapas miente al respeuto del procesu de reintroducción de la osa Villarina

La Fundación Oso Pardo (FOP) volvió referise güei a l'actitú del Fapas en rellación cola reintroducción de la osa Villarina y aseguró, al traviés d'un comunicáu, que'l Fapas "miente cuando tapez qu'existió un acuerdu tomáu nel conceyu del día 23 de setiembre del 2008 nel qu'hubo una propuesta del Principáu, pola qu'había un únicu representante ante los medios de comunicación demientres l'operativu".
   Según la Fundación Oso, cualquier de los asistentes al conceyu --miembros de l'Alministración Autonómica, CSIC, Universidá d'Uviéu, IREC, Fapas y FOP-- podía confirmalo, dao que toos sintieron la propuesta y asumiéronla. "El Fapas nun tardó munchu tiempu n'inorala, atribuéndose amás méritos que nun-y correspondíen", destacó la Fundación Oso.
   Amás, acusen al Fapas de mentir tamién cuando diz que'l control fotográficu mediante manipulación de carroñes contó cola collaboración de la guardería del Principáu d'Asturies, y aseguró que nenguna persona del Principáu de les que participaron y dirixeron los trabayos de siguimientu sobre'l terrenu, nin los técnicos, nin los responsables políticos, nin el restu de participantes, conocíen la manipulación de carroñes, realizada col únicu fin d'algamar imaxes.
   "Nin celos, nin problemes d'egu, nin berrinches, y sí un gran malestar que compartimos con tolos participantes nel operativu, que vieron cómo'l Fapas anteponía'l so deséu d'algmar semeyes penriba de cualquier otra consideranza", destacó la Fundación Oso, qu'añadió que resulta "llamentable" que, "en vez de dar esplicaciones sobre l'usu de carroñes a espaldes de tol mundu, introduciendo un seriu factor de riesgu nel procesu de reintroducción de Villarina, trate de xustificase echando una cortina de fumu con mentires y falsedaes".