El PP pide la comparecencia na Xunta de Buendía y responsables de Sedes pa conocer la situación financiera de la entidá

|

Demanda información sobre los proyectos, la venta de promociones y el futuru de la empresa pública ante la marcha de Caicoya

Encamienten a la sociedá que dea "un destín social" a los pisos de lluxu que tien paraos enantes que "se malviendan"
   UVIÉU, 30 de Setiembre (EUROPA PRESS)
   El Grupu Parlamentariu Popular na Xunta Xeneral del Principáu solicita la comparecencia parlamentaria del conseyeru de Mediu Ambiente, Ordenación del Territoriu y Infraestructures, Francisco González Buendía; y de los responsables de la empresa "pública" Sedes pa conocer la so actual situación financiera.
   Según indicó güei en rueda prensa'l diputáu del PP, José Agustín Cuervas-Mons, demándase información sobre'l grau d'execución de los proyectos que desarrolla; el nivel de venta de les sos promociones inmobiliaries; y les previsiones de futuru de la entidá ante la marcha del so director xerente, Santiago Caicoya.
   En sede parlamentaria, Cuervas-Mons argumentó qu'ún de los motivos de solicitar la comparecencia ye que'l PP pidió información referente a la empresa n'abril y que dende aquélla nun recibió respuesta.
   De la mesma manera, señaló la marcha del so director xerente como un aspectu relevante pa l'actividá de la entidá. Nesti sen, calcó na necesidá de saber "cuál ye'l grau d'adeudamientu y cómo va solucionase".
   El diputáu señaló qu'hai promociones en Sedes n'Uviéu, na costa asturiana y hasta fuera de la comunidá, ya firmó que'l PP nun comparte qu'una empresa con un 60% de participación pública se dedique a les promcoiones de viviendes de lluxu.
   Asina, dixo querer conocer tamién los proyectos executaos o en desarrollu nel ámbitu inmobiliariu, cuál ye'l grau de venta de les sos promociones, y cuálos son los "planes de la empresa pública si les ventes nun van bien".
   Cuervas-Mons propunxo, nesti sen, que se busquen alternatives a la falta de ventes de los pisos de lluxu que promueve Sedes, como dedicalos a fines sociales, como "viviendes tutelaes o d'acoyida", enantes de que se decida "malvendelos".
   Pela so parte, la diputada del PP, Alejandra Cuétara, que tamién intervino na rueda de prensa, apuntó como "razonable" que Sedes tenga  un nuevu plantegamientu de la so actividá ante l'actual situación del sector de la construcción.
   "Nun paez llóxico que dende'l sector públicu se faigan viviendes de lluxu", afirmó remarcando qu'amás "tán sin vender". Poro, y ante'l "mieu" de que se "malviendan", la diputada reiteró'l pidimientu del PP de buscar un destín social pa elles.

Contador Estadistiques