Yá puen consultase les actividaes de la "Axenda Didáctica Escolar"

Sol títulu de "Axenda Didáctica Escolar", la Conseyería de Cultura y Turismu pente medies de la Dirección Xeneral de Política Llingüística, presenta una nueva ufierta d'actividaes pal cursu 2009 - 2010. Como n'años anteriores l'oxetivu principal d'estes actividaes ye averar la lliteratura y la música asturiana al públicu mozo de la mano d'escritores, actores y músicos. D'esta manera tanto les actividaes ufiertaes pa la Educación Primaria como pa la Educación Secundaria, van cuntar cola presencia de les tres estayes: lliteraria, musical y teatral. Asina mesmo, tanto los colexos nos que se imparte Llingua Asturiana como de Gallego-Asturianu van tener la posibilidá d'alcontrar actividaes prestoses pa la reciella.
D'esta miente, no que cinca al planu musical, la ufierta comprende grupos como Mestura, que-y pondrá música al llibru "Poemes de carambelu"; el yá tradicional grupu Xentiquina o un conciertu didácticu de la mano de Xuacu Amieva. No tocante a la ufierta musical pa Secundaria,  rescampla la incorporación respectu a años anteriores de Diego Pangua, Xosé Antón Fernández (Ambás) y Lisardo Prieto col taller "Xénesis de la música folk na Asturies actual"; los músicos Florentina Cuardriello, Xune Elipe y Toli Morilla; y el grupu Mezá.
Pela so parte'l teatru tamién algama un papel protagonista na ufierta pa les dos estayes educatives, cuntando esti añu como novedá con grupos consagraos de la escena asturiana como "Higiénico Papel", "Quiquilimón", o "Margen".
Pa finar, y no que toca al planu lliterariu sorrayar el llabor de Chechu García que presentará un taller de la historia del comic asturianu adaptáu tanto a la estapa Primaria como a la Secundaria.

Pues consultar equí la ufierta completa d'actividaes pa dambes estayes, al tiempu que consultar la fueya d'inscripción.