El presidente del PP asturianu, Ovidio Sánchez, esixó que la Rede Treseuropea del Tresporte incluya'l nuesu país pente la construcción del AVE del Cantábricu. Según el dirixente popular "un proyectu que yá taba aprobáu y que foi paralizáu pol Gobiernu de José Luis Rodríguez Zapatero col combayamientu del presidente asturianu, Vicente Álvarez Areces, y del so conseyeru d'Infraestructures, Francisco González Buendía".

Sánchez afitó que'l pidimientu d'una llinia d'alta velocidá ferroviaria qu'una Asturies con Galicia y Cantabria tien agora más sentíu cola planificación del exe del Mediterraneu, presentáu ayer pol ministru José Blanco, un exe que nun inclúi a Asturies, dalgo que "nun lo queremos consentir y vamos tentar d'impedilo con iniciatives pa incorporar a Asturies al Treseuropéu y al Mediterraneu, pente la construcción de l'Alta Velocidá del Cantábricu".

Al so xuiciu, Asturies nun pue siguir escluyida del exe de desarrollu "de primer nivel". "Va retrasásemos l'alta velocidá cola meseta diez años y agora quedamos tamién escluyíos del exe mediterraneu pola voluntá socialista", conseñó. Entrugáu pola funcionalidá de la reforma de les llinies de FEVE, el dirixente popular consideró que la vía estrecha tien la so función, pero tamién les sos llendes y "nun compite" con una llinia de comunicación transeuropea.