Ta acabantes d’espublizase’l primer númberu de “Faceira”, una revista en formatu dixital que dende Zamora quier investigar y divulgar el patrimoniu cultural del dominiu llingüísticu ástur. Escrita na nuesa llingua, la revista quier sirvir de puntu d’alcuentru ente tolos territorios que falen asturianu. Asina, el títulu de la revista fai referencia’l aprovechamientu de los pastos comunales. Pa ello, nesti primer númberu cuenten con artículos de renomaos espertos d’Asturies, Lleón, Zamora y Miranda.

La revista ábrese col artículu del ex-presidente de l’Academia de la Llingua, Xosé Lluis García Arias, tituláu “El País Ástur”. Darréu vien “El mitu de las xanas en Llión”, de Nicolas Bartolomé Pérez, xurista y autor del llibru “Filandón: lliteratura popular llionesa”. En normativa mirandesa ta escritu  “Notícia de remanses, folhetos i fuolhas bolantes na Tierra de Miranda”, del profesor Antonio Bárbolo Alves. La revista tamién inclúi, ente otros munchos temes, un artículu sobre ornitoloxía, “La dieta de la curuxa na ciudá de Zamora”, de José Alfredo Hernández.
 
RECEICIÓN DE LA TPA EN LLEÓN
 
L’asociación “Leoneses por la Cultura Oral” (LECUORAL) pidió-y a la Junta de Castiella y Lleón que la TPA pudiera ser vista polos ciudadanos del país vecín, “yá que ye la única televisión qu’emite programes n’asturlleonés, llingua arreyada’l nuestru territoriu”. Dientro d’unes selmanes, la propia TPA va emitir dellos capítulos de “Camín de Cantares” grabaos na provincia de Lleón.