La Xunta concede’l Pegollu a la Ruta del Quesu y la Sidra d’Asiegu y el Madreñazu a la Conseyera de Cultura

La Xunta pola Defensa la Llingua Asturiana ta acabantes d’anunciar los ganadores de los XXV Premios Andrés Solar. Nesta ocasión el Pegollu foi pa la “Ruta del Quesu y la Sidra d’Asiegu”, iniciativa empresarial de calter turísticu a la que-y conceden el premiu pol so apueste decidíu pol idioma a lo llargo de diez años de vida y pol so exemplu de que l’asturianu nun ye un llastre, "sinón daqué que xuega al nuestru favor". Mientres que’l Madreñazu foi pa Mercedes Álvarez González, Conseyera de Cultura y Turismu del Principáu d’Asturies.

La versión positiva del premiu, el Pegollu, ye pa la “Ruta del Quesu y la Sidra d’Asiegu” pol usu que fai esta iniciativa empresarial de la llingua asturiana, “nun exemplu de normalidá y puesta en valor de les nuestres señes d’identidá”. Según señalen, la Ruta incorpora l’asturianu como un elementu más, usándolu y valorándolu, na actividá divulgadora que realicen na Ruta del Quesu y la Sidra, actividá turística na que la empresa ufierta a los sos clientes un recorríu alredor del quesu Cabrales, la sidra y el paisaxe rural asturianu. La empresa tamién apuesta pol asturianu nel etiquetáu de los sos productos, como ye’l casu de la “Sidra Pamirandi”.
 
La versión negativa del Andrés Solar, el Madreñazu, que reconoz a la persona o entidá que rescamplara pol so llabor negativu pa cola llingua asturiana, ye pa l’actual Conseyera de Cultura, Mercedes Álvarez González. Pa la Xunta hai un cientu de razones poles que “castigala” con esti premiu. Ente elles una política llingüística “inexistente, porque namás se ven determinaes iniciatives, les más de les veces bastante probes, que busquen principalmente ser coartada d’un Gobiernu qu’amuesa un despreciu y inoperancia absoluta énte’l preocupante futuru del nuestru idioma”.
 
La Xunta fina diciendo que “una política llingüística na que nun se trabaya nel avance de la llingua asturiana nos medios de comunicación, nel enseñu o na alministración nun merez esi nome, colo que la Xunta pola Defensa de la Llingua Asturiana considera que Mercedes Álvarez ye bona merecedora del antipremiu”.
 
La entrega de los Premios va facese’l día 19 d’avientu a les 19:30 hores nel Salón d’Actos del Antiguu Institutu de Xixón. L’actu va contar cola actuación musical de Lucas 15. Nesta ocasión dos miembros del grupu, Nacho Vegas y Xel Pereda, interpretarán temes del so primer discu.