Fai! participa nun alderique empobináu pol Conseyu de la Mocedá d'Uviéu

Al traviés d’un comunicáu, Fai! vien d’informar qu’un representante de la so organización llevó les sos postures no que cinca a oficialidá, botellón y ociu, crisis, vivienda ya igualdá a un alderique entamú pol Conceyu de la Mocedá d'Uviéu. Nel debate, que se cellebró nel Auditoriu d'Uviéu esti pasáu vienres 11 d'avientu, participaron les estayes de mocedá de los partíos mayoritarios, asina como otres organizaciones sociales del Conceyu.

L'actu, qu'entamó col alderique sobre la oficialidá, onde según la organización el representante de Juventudes Socialistas, Diego Asenjo, dixo que "el problema de la oficialidá débese a que los sos defensores nun tienen representantes serios. Si fueren persones series les que defendieren la oficialidá podríen llegar a convencer a xente importante del PSOE".

Fai! entrugó por dos vegaes, según señalen, ensin topar rempuesta nos partíos mayoritarios, “el por qué lo que val pa gallegos y valencianos nun casu, o pa catalanes y vascos n'otru, nun val pa les asturianes y asturianos”. Al tiempu, recriminó a la xente d'IX y BpA “les sos eternes promeses incumplíes de non pertenencia a un gobiernu que nun sofite a la oficialidá”. Ente les organizaciones representaes pa esti tema taben, amás de Fai!, Xunta Moza, Bloque por Asturies, Nuevas Generaciones, Área de Mocedá d'IX y Juventudes Socialistas
 
Nel segundu bloque temáticu abordóse l'ociu y el fenómenu del botellón. Onde Fai! criticó “la hipocresía d'una sociedá y unos dirixentes que namás ven problemes nel consumu d'alcohol si esti ye na cai y non si ye en locales”. Del mesmu mou que criticó la política d'ociu "carca" d'Uviéu ensin alternatives culturales y la ordenanza de convivencia ciudadana del Conceyu.
 
No que cinca a la vivienda, Fai! amosóse partidariu de la estatalización de la mesma, “al ser esti un derechu humanu y tando recoyíu na mui probe constitución española, siendo ésti l'únicu mecanismu que garantice l'exerciciu del derechu a la vivienda digna”