Ñaz el Coleutivu d'Internautes pol Asturianu pa sofitar la presencia de la llingua na rede

El Coleutivu d'Internautes pol Asturianu (CODIPA) ye un organización formada por usuarios d'internet que nagüen por navegar pela rede usando la llingua asturiana.  La so primer aición ta siendo l’atropar a miles de persones na petición de que la rede social Tuenti (una de les más usaes pola mocedá asturiano) tenga una versión n'asturianu. En pocos díes cuasi 10.000 usuarios d'esta rede social "esixeron" la versión na llingua d'Asturies y otros 6.000 simpaticen cola idea.

El coleutivu va trabayar con campañes que sofiten la presencia del asturianu n’internet (redes sociales, páxines institucionales y d’empreses, etc.) el respetu a la toponímia asturiana nes páxines en cualesquier llingua, y l’algame d’un dominiu .ast, como finxos cimeros. Amás, esti coleutivu d'internautes asturianos va collaborar con otres persones, empreses, instituciones... pa facer posible estos avances nel usu del asturianu nel campu tecnolóxicu, incluyendo la collaboración con proyectos de software llibre, que dende va un tiempu espoxiguen en llingua asturiana perdayuri.
 
CODIPA sigue atropando sofitos a la campaña pol Tuenti n'asturianu y yá se punxo en contautu con responsables de la rede social pa desplica-yos la vindicación de miles d'usuarios y ufiertase pa trabayar la torna a la nuesa llingua. Los responsables de Tuenti amosaron la so disposición a tener una versión n'asturianu.

Dende'l CODIPA ven estos primeros contautos con Tuenti como positivos y esperen que los siguientes sigan siéndolo y puxar asina por que l'asturianu tenga presencia “nuna rede social utilizada por miles d'asturianos qu'asina podríen facer usu de la so llingua”.