Fai! califica como vidables los sos dos años d'actividá na so II Asamblea Xeneral Estraordinaria

La organización d'esquierda soberanista Fai! vien de cellebrar nel pasáu mes de payares la so II Asamblea Xeneral Estraordinaria, na que'l conxuntu de la militancia fexo un balance del trabayu desendolcáu nel últimu añu, asina como poner al día los testos orgánicos de Fai! al traviés d'enmiendes “que fueron aprobaes en tolos casos per unanimidá”. Depués de dos años de trabayu la organización califica’l so proyeutu como vidable.

De la mesma manera, l'Asamblea debatió la Carta Estratéxica, reorganizóse internamente y diseñó les próximes campañes de la organización. El trabayu más de tipu internu tornóse depués nun debate abiertu sobre la situación de les reivindicaciones de la esquierda soberanista, asina como de los propios actores políticos del entornu ideolóxicu de la organización.
 
Les conclusiones a les que Fai! llega como consecuencia d'esti alderique “empobinen en conxuntu a siguir na construcción d'un espaciu políticu alternativu a la dinámica partidista dende'l que defender los postulaos pa un cambeu dafechu n'Asturies, polo que'l propiu proyeutu de Fai!, dende la mayor humildá y autocrítica, analízase como vidable dos años depués del so entamu”.
 
Fai! siguirá debatiendo y valorando los futuribles movimientos dientro de la escena política de la esquierda soberanista asturiana en próximes Asamblees Ordinaries, “faciendo por nun quedar estáticos/ques o dir a remolque de los acontecimientos”. Per otra parte tamién s'abrieron debates ideolóxicos mui interesantes que van siguir teniendo continuación con conceyos monográficos nel futuru.
 
En cuantes a la reorganización interna, Fai! quier siguir faciendo por averase a les dinámiques propies de cada conceyu, promoviendo l'espoxigue d'asamblées de la organización, dando prioridá a los conceyos abiertos nos que se trabaye dende les bases y cuntando cola opinión de tola xente. Fai! analizó en positivo l'abrise más al públicu pa envolver na estratexa de la esquierda soberanista organizada al mayor númberu posible de persones y sensibilidaes, dando per entamao una campaña d'afiliación pa esti 2010.