El 71% de los vascos resabia de la predisposición d'ETA y la so redolada social a poner fin a la violencia y un 66% de la voluntá de la esquierda abertzale p'aceptar les regles del xuegu.

Jesús Iglesias afirmó que l'astención na votación del proyeutu pal amenorgamientu del déficit ye "la única forma de casar razonablemente les distintes posiciones sobre los dos aspeutos básicos del proyectu de llei: l'amenorgamientu del xornal de los funcionarios y les reformes fiscales".

El númberu de paraos n'Asturies baxó en 4.353 persones en xunu, lo que supón un descensu del 5,48% con respeutu al mes pasáu, y asitió'l númberu de paraos en 75.044.

Asturies rexistra, d'alcuerdu a los datos publicaos güei pol Ministeriu de Trabayu, la segunda mayor baxada de paraos, tres la comunidá de Cantabria onde'l la baxada foi del 5,95 por cientu.

L'expresidente de Gobiernu José María Aznar achacó al PSOE y al so líder, José Luis Rodríguez Zapatero, tola responsabilidá del llíu qu'hubo estos años al rodiu l'Estatut.

El Conceyu Universitariu pol Asturianu (CUPA) ta acabante unviar a la Universidá d’Uviéu una propuesta pa que la nueva imaxe corporativa seya billingüe en castellán y n’asturianu.

La nueva imaxe va usase pola mor del nuevu proyectu de Campus d’Escelencia. La propuesta foi enviada al traviés d’un de los representantes del CUPA nel Claustru de la Universidá, siguiendo’l trámite de consultes abiertu por esta.

Anque’l día grande ye’l próximu sábadu, la XIV Fiesta de la Oficialidá de Bimenes entama güei cola entrega de los premios del 'Concursu de Cuentos pola Oficialidá'.

Pablo Rodríguez Medina foi el ganador del primer premiu (800 euros) del ‘XIII Concursu de Cuentos pola Oficialidá del Asturianu’, cola obra ‘Aproveciendo de fraxilidá’. Mientres que’l segundu premiu (500 euros) foi pal cuentu 'Les circunstancies', de Ricardo Candás Huerta, y ‘Cazumbre’ de Xuan Carlos Crespos Lanchas algamó’l tercer premiu (350 euros).

Güei entamó’l cursu ‘'El tratamiento integrado de las lenguas y el desarrollo de proyectos lingüísticos' dirixíu a docentes de toles árees y materies, especialmente les llingüístiques.

L'oxetivu d'esta xornada ye ufiertar orientaciones metodolóxiques y didáutiques rellacionaes col tratamientu integráu de les llingües  y cola necesidá d'un abordaxe integráu de les mesmes nel marcu d'un plan llingüísticu común de centru, pa lo cual preséntense esperiencies de proyeutos llingüísticos desenvueltos por distintos centros d'Asturies, según informó'l Gobiernu.

El Senáu va aprobar esti mes la reforma del so Reglamentu p'ampliar l'usu de les llingües autonómiques, l'asturianu va quedar fuera de la norma al nun ser oficial.

La ONG de promoción de la diversidá llingüística Linguapax d'Unescocat llamentó qu'España dexare de considerase un exemplu de proteición de la "diversidá llingüística".

La operación d'integración del negociu bancariu de Caja Castilla La Mancha nel Banco Liberta, del Grupu Caxastur, va rematase nes próximes selmanes.