Bimenes celebra la oficialidá

Anque’l día grande ye’l próximu sábadu, la XIV Fiesta de la Oficialidá de Bimenes entama güei cola entrega de los premios del 'Concursu de Cuentos pola Oficialidá'.

Pablo Rodríguez Medina foi el ganador del primer premiu (800 euros) del ‘XIII Concursu de Cuentos pola Oficialidá del Asturianu’, cola obra ‘Aproveciendo de fraxilidá’. Mientres que’l segundu premiu (500 euros) foi pal cuentu 'Les circunstancies', de Ricardo Candás Huerta, y ‘Cazumbre’ de Xuan Carlos Crespos Lanchas algamó’l tercer premiu (350 euros).

La entrega de premios sedrá a les 19.30 hores na Casa Conceyu (Martimporra). Pero los actos continúen a les 20.30 na Casa la Cultura de Santuyano, onde va representase la obra ‘Nel cielu hai una estrella’, a cargu del Grupu de Teatru “El Hórreo”.

El sábadu 3 de xunetu, el día grande, cola llectura al pregón a cargu del cantante deDixebra Xune Elipe, una misa n’asturianu, lla VIII Feria d’Artesanía y Mercáu de Productos Agroalimentarios y l’actuación de los grupos folklóricos Los Yerbatos (Bimenes) y Os Pauliteiros (Miranda del Douro).

A lo llargo del día habrá una xinta, una Puya’l ramu con un taller de manualidaes pa neños y el XI Concursu de Gaiteros y Gaiteres Mozos. El fin de la XIV Fiesta de la Oficialidá vendrá a les 23.00 hores, col conciertu de La Bandina la Curuxa, La Tarrancha y DJ – J15.

Bimenes, trubiecu de la oficialidá

Foi’l 4 de xunetu de 1997, cuando’l Conceyu de Bimenes, dirixíu por Joaquín García (IX) dio’l pasu de declarar la oficialidá del asturianu, entamando un procesu que siguieron Morcín, Castrillón, Casu, Teberga, Llaviana, Llangréu y  Llanera.

Sicasí, el Tribunal Superior de Xusticia d’Asturies declara nules toles mociones. Dende aquella fecha, el conceyu pioneru nel reconocimientu de los derechos llingüísticos vien celebrando la Fiesta de la Oficialidá pa conmemorar aquel fechu.