El secretariu xeneral de la FSA, Javier Fernández, amosó tol respetu" de la organización a la decisión d'Areces, qu'anunció ayeri que refuga volver presentase como candidatu socialista.

Asina, en declaraciones a los medios de comunicación a lo cabero del plenu de la Xunta Xeneral, Fernández paróse pa treslladar al presidente asturianu "un sofitu total hasta'l momentu en que remate la llexislatura".

Un xuez de distritu del estáu estaounidense de Massachusetts resolvió que la llei nacional que prohibe'l matrimoniu gai nos Estaos Xuníos ye inconstitucional.

El xuez Joseph Tauro dictaminó en favor de los derechos de los homosexuales en relación a dos demandes presentaes contra la Llei de Defensa del Matrimoniu de 1996, conocida como la DOMA.

Suatea califica la etapa d’Areces como negativa. El sindicatu destaca los pasos haza atrás cola llingua, "como l'aprobación d'un currículu onde nun se menta l'idioma".

“El mandatu del Sr. Areces foi'l del villano d'esa mal llamada “carrera profesional” y la Llei d'Evaluación, discriminatoria ya inxusta como poques, amás de ceadora d'una fonda fendedura dientro del profesoráu”, afirmen dende’l sindicatu.

El Principáu concedió diez llicencies de radio, ente los requisitos pa l’axudicación nun esistía’l fomentu del idioma. Mientres, sigue ensin iguase la situación de Radio Sele.

Xuristes pol Asturianu vien d’encamentar a RTVE l’adopción de les midíes afayadices pa que’l Centru Territorial d’Asturies realice les sos desconexones n’asturianu.

L’asociación unvió un testu a la Comisión Mista Congresu-Senáu de Control Parllamentariu de la Corporación RTVE, onde afirmen que la falta d’oficialidá nun tien que tener nenguna trescendencia porque l’orixe de la normativa reguladora atópase estramuries del Estáu español.

La Coordinadora Ecoloxista presentó suxerencies nel trámite de consultes d'un parque eólicu n'Os Ozcos (yá son 6 parques) que se va instalar en Vilanova, na frontera con Santalla.

Esti nuevu parque ye'l Regodeseves por parte d'Iberdrola con 20 aerogeneradores de dos Megavatios de 78 metros d'altor de buxe, 90 metros de diámetru de rotor dientro de la reserva de la Biosfera 'Riu Eo, Ozcos y Terras de Burón'.

El Secretariu d'Organización d’UNA, Roberto Holgado, pidió la devolución de la primer planta de la casa sindical d'Avilés y esixe la llibre absolución de los sindicalistes de la CSI.

Holgado participó con otros militantes d’Unida Nacionalista Asturiana na concentración de sofitu a los sindicalistes del martes y tresmitió'l malestar de la organización  cola actuación de la fiscalía actuación contra los sindicalistes de la CSI pola ocupación de la primer planta de la casa sindical d'Avilés, cedida a FADE y abandonada dende va años.

Areces comunicó al Secretariu Xeneral de la FSAy al Secretariu Xeneral del PSOE que nun va volver a ser candidatu a la Presidencia d'Asturies pa les eleiciones de mayu de 2011.

“Considero que ye la decisión correcta depués de tres lexislatures nes qu'actué siempres con total llealtá al Partíu Socialista, a los nuesos electores y tamién a tol pueblu asturianu, destinatariu últimu del nuesu trabayu dende l'acción de gobiernu”, afirmó güei’l Presidente nuna rueda de prensa ensin turnu de preguntes.

L’alcaldesa de Xixón, Paz Fernández Felgueroso, afirmó güei xueves que la salida del Bloque del Gobiernu d’Asturies ye una decisión que la formación sabrá porque tomó.

Felgueroso indicó que si la respuesta ye pola xubida d'impuestos, nun entiende bien les razones. Pese a too, apuntó que supón que Bloque per Asturies va dar más esplicaciones y que les analizará colos qu'hasta agora foron los sos asociaos, IX y Los Verdes.

Xunta pola Defensa de la Llingua Asturiana y Xunta Moza van aprovechar les fiestes de branu pa poner meses informatives y puestos de venta de materiales de la organización.

“Paeznos que ye una bona manera de da-y protagonismu a la reivindicación llingüística, llegar a la xente y esparder información sobre les nuestres campañes y actividaes”, informen dende la web de la Xunta.

Fitoria, Bimenes y Cangas van ser dalgunos llugares nos que van tar presentes esti branu. “Esti branu, defendi la to llingua. Pasa pel puestu de la Xunta”, señalen.