El desemplegu baxó en 4.353 persones en xunu

El númberu de paraos n'Asturies baxó en 4.353 persones en xunu, lo que supón un descensu del 5,48% con respeutu al mes pasáu, y asitió'l númberu de paraos en 75.044.

Asturies rexistra, d'alcuerdu a los datos publicaos güei pol Ministeriu de Trabayu, la segunda mayor baxada de paraos, tres la comunidá de Cantabria onde'l la baxada foi del 5,95 por cientu.

El paru baxó en tolos sectores el mes pasáu nel país. El mayor descensu rexistróse en servicios con 2.944 paraos menos, siguíu de la construcción con 604 paraos menos y de la industria, con 531 paraos menos. El coleutivu ensin emplegu anterior baxó en 265 persones y nel casu de l'agricultura son nueve los paraos menos.
  
De los 75.044 paraos rexistraos n'Asturies, 40.197 son homes y 34.847 muyeres. Los más dellos, 67.304, tienen más de 25 ente que 7.740 son menores d'esa edá.
  
Por sectores, la gran parte de los paraos asturianos, 47.931, pertenecen a servicios; 11.954 a la construcción; 8.269 a la industria y 875 a l'agricultura. Un total de 6.015 inclúyense nel grupu ensin emplegu anterior.
  
A nivel estatal, el númberu de paraos rexistraos nes oficines de los servicios públicos d'emplegu (antiguu Inem) amenorgóse en 83.834 persones en xunu, un 2,06 por cientu al respective de mayu, colo que'l volume total de paraos asitióse en 3.982.368 persones, baxando de los cuatro millones per primer vegada dende avientu de 2009.