Unescocat diz qu'España dexa de ser exemplu de proteición de les llingües

La ONG de promoción de la diversidá llingüística Linguapax d'Unescocat llamentó qu'España dexare de considerase un exemplu de proteición de la "diversidá llingüística".

Nun comunicáu, Linguapax aseguró que con esta sentencia el Tribunal Constitucional (TC), que recorta l'artículu 6.1 del Estatut de Cataluña, que reconoz el catalán como llingua preferente nesta comunidá España pasa a formar parte de los estaos que caltienen una xerarquía ente les llingües y acepten procesos de sustitución llingüística a favor de los idiomes más protexíos.
  
Pa la ONG, la sentencia del TC ye un "error" porque debilita l'estatus llegal del catalán, algo que va faer recular el so usu a favor del castellán, "beneficiáu yá por un centenar de disposiciones xurídiques".
  
Amás, piensa que la sociedá catalana -qu'agora vivía de manera "non conflictiva" la recuperación del catalán tres años de Franquismu-, "va sentise víctima d'una agresión", lo que va enzancar la convivencia llingüística.
  
Per otra parte, el Conseyu Nacional de la Mocedá de Catalunya (CNJC) y el Conseyu de la Mocedá de Barcelona (CJB) llamentó que la sentencia nun debería producise nunca ante la "deslexitimación" del TC.
  
Ambos conseyos defendieron que Catalunya ye una nación "como siempre lo espresó'l so máximu suxetu políticu: el pueblu catalán". Por ello, animó a tolos mozos a participar na manifestación del 10 de xunetu contra la sentencia.