‘Non a los retayos sociales y llaborales. Pol derechu a una digna: pensión pública’ ye’l lema de la cadena humana que ta convocada pal 2 de marzu na puerta’l Bancu d’España. Suatea, CNT, CSI y CGT entamen esti actu de protesta.
El fin de selmana musical va tar protagonizáu pola actuación de Duerna, el sábadu en Cenera, y pol homenaxe a Piñera que van facer el domingo los sos collacios na sala Savoy nel so cabudañu. Nél destaca l’actuación de Sambre, KPE y Kings of Makaha.
Les mocedaes del PAS, Xuventú Asturianista, van volver a homenaxear a Emilio Robles Muñiz, Pachín de Melás, coincidiendo col aniversariu de la so muerte na cárcel d’El Coto. Va haber llectura de poemes del escritor y una actuación musical.
El bencén, un hidrocarburu cíclicu volatil canceríxenu, xubió un 39 por cientu na calidá del aire d’Aviles nel 2010 en comparanza col añu anterior. El Coleutivu Ecoloxista d’Avilés reclama al Gobiernu una investigación.
Bloque por Asturies, PP y IX-Verdes sacaron alantre esti vienres una moción na que soliciten al PSOE’l sobreseimientu de los espediente abiertos a dos funcionarios de la Campa Torres. Éstos son Ángel Villa y Elisa Collado.
El ‘Bailla la Crisis Tour’, nome que va llevar la xira de Dixebra pal 2011, va principiar el 11 de marzu na Sala Albéniz de Xixón. Les primeres 300 persones qu’entren al recintu van recibir un CD con cinco cantares inéditos de la banda.
L’abellugu antiareu de Cimavilla podría convertise nun muséu y centru d’interpretación. El Conceyu de Xixón presentó esti xueves un proyeutu pa recuperar esti recintu agora abandonáu y pa señalizar los 154 abellugos esistentes na ciudá.
El plan de choque del Gobiernu estatal contra los paraos de llarga duración y el desemplegu xuvenil aprobóse esti xueves nel Congresu. Ésti inclúi una ayuda de 400 euros y bonificaciones a empreses pa la contratación a tiempu parcial.
L’ex conseyeru d’Educación, José Luis Iglesias Riopedre, va poder salir de la cárcel en llibertá provisional previo pagu de 100.000 euros. Riopedre ta en prisión preventiva pol casu de corrupción n’Alministración asturiana dende’l 25 de xineru.
‘Ágora’, d’Anabel Santiago; ‘Chueve’, de Brandal’; y ‘I & C’, de Corquiéu, son los tres temes nominaos na categoría ‘Meyor cantar n’asturianu’ pa los XV Premios de la Música. La gala d’entrega va celebrase’l 18 de mayu en Madrid.
