El Congresu aprueba una ayuda nueva de 400 euros a paraos de llarga duración

El plan de choque del Gobiernu estatal contra los paraos de llarga duración y el desemplegu xuvenil aprobóse esti xueves nel Congresu. Ésti inclúi una ayuda de 400 euros y bonificaciones a empreses pa la contratación a tiempu parcial.
 
80.000 paraos van beneficiase d’esta ayuda nueva de 400 euros que vien a sustituyir l’anterior de 426 euros, a la que pudieron acceder nel so día 198.000 persones. Van ser beneficiaries d'esti programa les persones qu'acabaren la so proteición por desemplegu a partir del 16 de febreru del 2011 y nun cumplan colos requisitos d'accesu a la Renta Activa d'Inserción.Esta ayuda denominada 'Programa de recualificación profesional de les persones qu'acabaren la so protección por desemplegu', ta concebida más como un acompañamientu económicu a aiciones de formación propies de les polítiques actives, que como una prestación. Por ello, obliga a los beneficiarios a realizar un itinerariu personalizáu d'inserción, que contemple'l diagnósticu sobre la so empleabilidá y la participación n'aiciones de recualificación y/o reinserción llaboral.
 
Mentes, el 'Programa escepcional d'emplegu pa la transición hacia la contratación estable', orientada a mozos y moces menores de 30 años que sían paraos de llarga duración, prevé qu'aquelles empreses que contraten a tiempu parcial mientres l'añu posterior a l'aprobación del programa y nun reduxeren plantiya nos últimos seis meses, van ver amenorgaes les sos cuotes a la Seguridá Social. ERC, IU, ICV, BNG, NaBai y PP consideren qu’esti programa destináu a reducir el paru xuvenil va fomentar los nomaos contratos basoria.
 
El PSOE pudo sacar el so plan de choque alantre gracies a los apoyos de CiU y Coalición Canaria. ERC, BNG y UPyD votaron en contra, mentes que PP, PNV y IU-ICV abstuviéronse. Estes midíes, amás, tramitáronse como decretu llei, como pretendía’l Gobiernu estatal.