Los paros de dos hores por turnu convocaos n’El Musel polos estibadores desarrolláronse con normalidá. Los trabayadores, que paralizaron un buque contenedor, reclamen que la carga de coches nuevos na Autopista del Mar sía llabor suyu.
Fernando Vicente, investigador del SERIDA, va participar nel Cursu-Taller Internacional de Producción de Lleche en Pastoréu que va celebrase del 4 al 8 de marzu en Toluca. L’espertu va ofrecer dos ponencies sobre esti tema.
Echar gasolina agora ye más caro que nunca. Según los datos del Boletín Petroleru de la Xunión Europea, el llitru de combustible supera los 1,3 euros, lo que supón el so máximo históricu.
Una sentencia d’un tribunal catalán na llinia de les reclamaciones de la Coordinadora Ecoloxista d’Asturies, lleva a esti coleutivu a solicitar al Gobiernu que paralice tolos parques eólicos en tramitación. De lo contrario, caería n’illegalidá.
Asturies va tar presente na Apfelwein im Römer, feria internacional de sidre que va celebrase los díes 12 y 13 de marzu na ciudá alemana de Frankfurt, gracies a la participación de Trabanco. La revista La Sidra collabora na organización d’esti certame.
Asturies zarró’l mes de febreru con 88.072 paraos, lo que supón 2.064 persones más qu’en xineru, según los datos del Ministeriu de Trabayu y Inmigración. Trátase de la cifra más alta rexistrada dende l’añu 1996.
El Consorciu pa la Xestión de Residuos Sólidos d'Asturies (Coxersa) nun va tratar residuos procedentes de fuera, según aseguró’l Gobiernu. ACA alertó esta selmana de la posibilidá de qu’Asturies fuera nel futuru basureru d’otres comunidaes.
El Conceyu Abiertu qu’entrugaba sobre’l cambiu del modelu d’Alvia de la llinia Asturies-Madrid dexó nidia la postura de los usuarios d’Asturies.com. Un 71 por cientu considera qu’esta decisión “ye una manera más de riise de los asturianos”.
El miércoles 16 de marzu va celebrase en Xixón un charra sobre la contaminación por mercuriu en fontes y manantiales. Nél va presentase un estudiu sobre la presencia d’esti metal pesáu nes agües de Xixón y Carreño.
La guía ‘Comer entre asturianos’ acaba d’actualizase cola incorporación de chigres nuevos onde poder disfrutar de la cocina del país en Madrid. Ésta va presentase esti xueves na Delegación del Gobiernu na comunidá madrilana.
