Anabel Santiago, Brandal y Corquiéu, candidatos a los XV Premios de la Música

‘Ágora’, d’Anabel Santiago; ‘Chueve’, de Brandal’; y ‘I & C’, de Corquiéu, son los tres temes nominaos na categoría ‘Meyor cantar n’asturianu’ pa los XV Premios de la Música. La gala d’entrega va celebrase’l 18 de mayu en Madrid.
 
L’Academia de les Artes y les Ciencies de la Música –institución creada pola SGAE y Artistas, Intérpretes y Ejecutantes, Sociedad de Gestión de España (AIE)– ta acabante de facer públiques les candidatures a les 28 categoríes de los XV Premios de la Música, que van entregase’l 18 de mayu nel Teatro Arteria Coliseum de Madrid. No que respecta a la de ‘Meyor cantar n’asturianu’, nesta ocasión tán nominaos Anabel Santiago, Brandal y Corquiéu, grupu ésti últimu que tamién taba na llista de preseleicionaos de los ‘Premios al Meyor Cantar’, anque col tema ‘Alma balera’.
 
Dixebra, con ‘El cantar de la redención’, foi’l grupu ganador de la edición pasada de los Premios de la Música na categoría ‘Meyor cantar n’asturianu’, galardón qu’enantes yá se llevaren Manolo Morán, Los Berrones, Rossaleda Jazz Quartet, Tejedor y Esther Fonseca.